Goa Education: आता शाळेत बॅग घेऊन जाण्याची गरज नाही; नवीन शिक्षण पद्धतीनुसार गोव्यात सुरु होणार 'बॅगलेस डेज'

पणजी: गोव्यात नवीन शिक्षण पद्धतीची अंमलबजावणी लवकरच केली जाईल आणि यानुसार गोवा शिक्षण संचालनालयाने एक परिपत्रक जारी करून आगामी शैक्षणिक वर्षासाठीची योजना स्पष्ट केली आहे. नवीन शिक्षण पद्धतीच्या अंतर्गत आता विद्यार्थ्यांना जड बॅग घेऊन शाळेत जाण्याची गरज भासणार नाही.

शैक्षणिक वर्ष २०२५-२६ पासून गोव्यात इयत्ता ६ वी आणि १०च्या विद्यार्थ्यांसाठी राष्ट्रीय शिक्षण धोरण २०२० लागू केले जाईल. या नवीन शिक्षणपद्धतीनुसार इयत्ता ६वी च्या विद्यार्थ्यांसाठी, अभ्यासक्रमात १० विषयांचा समावेश असेल. गणित, विज्ञान आणि सामाजिक शास्त्र यांसारख्या मुख्य विषयांसह भाषेच्या शिक्षणावर भर दिला जाईल.

राष्ट्रीय शिक्षण धोरण २०२० च्या आराखड्याशी जुळणारी नवीन पाठ्यपुस्तके दिली जातील. मूल्यांकन पद्धतीतही बदल होईल, ज्यात अंतर्गत मूल्यमापन (प्रोजेक्ट्स, असाइनमेंट) आणि बाह्य परीक्षांचा समावेश असेल.

इयत्ता १०वी मध्येही राष्ट्रीय शिक्षण धोरण लागू झाल्यानंतर बदल दिसून येतील. दहावीच्या पाठ्यपुस्तकांमध्ये बदल होणार नसला तरीही इंटरडिसिप्लिनरी स्टडीज हा नवीन विषय लागू केला जाईल. इयत्ता ६ वीची सत्र पद्धत बदलणार नाही तर इयत्ता १० वी वार्षिक परीक्षा पद्धती कायम ठेवली जाणार आहे.

माध्यमिक शाळांसाठी 'बॅगलेस डेज'

नवीन शिक्षण पद्धतीनुसार गोव्यातील माध्यमिक शाळा विद्यार्थ्यांसाठी (इयत्ता ६ वी ते ८ वी) 'विना दप्तर दिवस' ही एक अनोखी शिक्षण पद्धत सुरू करण्यात येणार आहे. यामध्ये शाळकरी मुलांना वर्षातून १० दिवस त्यांचे जड दप्तर घेऊन येण्याची गरज भासणार नाही. विद्यार्थी विनादप्तर शाळेत येणार म्हणजे नेमके कोणते बदल करावे लागतील यावर अधिक माहिती लवकरच जारी करण्यात येणार आहे. सध्या गोवा सरकार टप्प्याटप्प्याने नवीन शिक्षण पद्धतीची अंमलबजावणी करण्याच्या प्रयत्नात आहे.