CM Pramod Sawant On Dr. Ambedkar Jayanti: भारतीय राज्यघटनेचे शिल्पकार डॉ. बाबासाहेब आंबेडकर यांची जयंती आत्तापर्यंत काही संघटना आणि समाज कल्याण मंत्रालयातर्फे साजरी केली जात होती.

पण यापुढील काळात आंबेडकर जयंती राज्याचा सोहळा म्हणून साजरी केली जाईल, अशी घोषणा मुख्यमंत्री डॉ. प्रमोद सावंत यांनी केली.

पाटो येथील डॉ. बाबासाहेब आंबेडकर उद्यानात आंबेडकर जयंतीनिमित्त झालेल्या कार्यक्रमात ते बोलत होते. समाजकल्याण मंत्री सुभाष फळदेसाई यावेळी प्रमुख उपस्थित होते.

यावेळी आंबेडकरांची प्रेरणा घेऊन कार्यरत असलेल्या चौघा जणांचा सन्मान करण्यात आला. याशिवाय समाजकल्याण मंत्रालयातर्फे विविध शिष्यवृत्तींचे वाटप आणि इतर काही जणांचे सन्मानही झाले.

मुख्यमंत्री म्हणाले की, डॉ. बाबासाहेब आंबेडकर भवनाचा विषय याबाबतच्या समितीने लावून धरलेला आहे. त्यात मंत्र्यांसह कार्यकर्त्यांचा समावेश आहे. या भवनासाठी जागा घेतली होती पण तांत्रिक कारणामुळे ती जागा बदलावी लागली.

पण पर्वरीतीच नवीन जागा घेतली आहे. लवकरात लवकर येथे पुढच्या वर्षभरात आंबेडकर भवन बांधणार. या भवनात पेडण्यापासून ते काणकोणपर्यंतचे जे विद्यार्थी शिक्षणासाठी येणार आहेत, त्या विद्यार्थ्यांची राहण्याची सोयही येथील हॉस्टेलमध्ये करण्याचे नियोजन आहे.