गोव्यात नव्याने उभारण्यात आलेल्या मोपा आंतरराष्ट्रीय विमानतळाचे (Mopa International Airport) आज (रविवारी) पंतप्रधान नरेंद्र मोदी यांच्या हस्ते उद्धाटन केले जाणार आहे. 2016 साली पायाभरणी झालेल्या या विमानतळ 06 जानेवारीपासून लोकांच्या सेवेत सक्रिय होणार आहे. गोव्याचे माजी मुख्यमंत्री मनोहर पर्रीकर (Manohar Parrikar) यांच्यासाठी महत्वकांक्षी असलेल्या विमानतळाला मनोहर पर्रीकर यांचेच नाव देण्यात आले आहे.

मुख्यमंत्री डॉ. प्रमोद सावंत यांनी आज मोपा विमानतळाच्या उद्घाटनापूर्वी मनोहर पर्रीकर यांच्या समाधीस्थळाचे दर्शन घेऊन त्यांना श्रद्धांजली अर्पण केली आहे. "भाई, आम्ही नेहमी तुमचे स्मरण करतो. आज तुमचे आणखी एक स्वप्न पूर्ण होत आहे. तुमचा आशिर्वाद आम्हाला आणि समस्त गोमन्तकीयांना उर्जा देत राहो. तुम्हाला भावपूर्ण श्रद्धांजली." अशा शब्दात मुख्यमंत्री डॉ. प्रमोद सावंत यांनी मनोहर पर्रीकरांना श्रद्धांजली अर्पण केली आहे.

दरम्यान, अत्याधुनिक, सर्वोत्तम तंत्रज्ञान आणि पायाभूत सुविधांच्या मध्यवर्ती संकल्पनेवर उभारण्यात आलेल्या मोपा विमानतळासाठी सुमारे 2,870 कोटी रुपये खर्च करण्यात आले आहेत. पहिल्या टप्प्यात या विमानतळावर दर वर्षी 4.4 दशलक्ष प्रवाशांची ये-जा क्षमता असेल, ती टप्प्याटप्प्याने वाढून 33 दशलक्ष होण्याची शक्यता आहे. जानेवारीत जवळपास 200 विमान या विमानतळावर उतरतील असा अंदाज आहे.