CM Pramod Sawant Delhi Visit: श्रावणी सोमवारनिमित्त गोव्याचे मुख्यमंत्री डॉ. प्रमोद सावंत यांनी काल (सोमवार) वाराणसीच्या बाबा विश्वनाथचे दर्शन घेतले. त्यांनी तिथे गंगाजल आणि दुधाचा अभिषेक करण्याबरोबरच षोडशोपचार पद्धतीने बाबा विश्वनाथांची पूजा केली.

काल वाराणसीवरून ते दिल्लीला रवाना झाले होते. मुख्यमंत्री दिल्लीत पोचल्यावर त्यांनी पक्षाच्या काही पदाधिकाऱ्यांशी चर्चा केली. व्ही. सतीश यांनी नोंदवलेली निरीक्षणे आणि लोकसभा निवडणूक तयारीसंदर्भात ही चर्चा झाली. या भेटीदरम्यान मंत्रिमंडळ फेरबदलाविषयी चर्चा झाली असल्याची शक्यता वर्तवण्यात येत आहे.

आज गोव्यात परतल्यावर त्यांनी माध्यमांशी संवाद साधला. यावेळी ते म्हणाले की, 'मी वाराणसीमध्ये श्रावणी सोमवारनिमित्त संपूर्ण गोवेकरांच्यावतीने बाबा विश्वनाथचे दर्शन घेतले आणि राज्याच्या हितासाठी प्रार्थना केली. '

यावेळी मंत्रीमंडळ विस्तार, राज्यात सध्या चर्चेचा मुद्दा बनलेले कथित सेक्स स्कॅंडल प्रकरण आणि गोवा विद्यापीठातील विद्यार्थिनींवरील अत्याचारप्रकरणी मुख्यमंत्र्यांना विचारले असता ते म्हणाले की, मी दिल्लीला माझ्या वैयक्तिक कारणासाठी गेलो होतो. सेक्स स्कॅंडल आणि गोवा विद्यापीठ प्रकरणाबाबत चौकशी सुरू आहे. याबाबत जसजशी माहिती येईल ती आम्ही तुम्हाला देऊ.

यावेळी राज्यातील या महत्वाच्या विषयांवर मुख्यमंत्र्यांनी सविस्तर बोलणे टाळले असल्याचे दिसून येत आहे.