Goa CM Visits Agricultural University Construction Site and Fisheries Center

तिसवाडी: जुने गोवे येथे नवीन गोवा कृषी महाविद्यालयाचे बांधकाम सुरू असून मुख्यमंत्री डॉ. प्रमोद सावंत यांनी आज या बांधकामाची पाहणी केली, तसेच येथील मत्स्यव्यवसाय प्रशिक्षण केंद्रालाही भेट देऊन सुविधांचा आढावा घेतला. यावेळी मुख्यमंत्र्यांसोबत संबंधित अधिकारी तेथे उपस्थित होते.

गोवा कृषी महाविद्यालयाचे बांधकाम सुरू झाल्यानंतर मुख्यमंत्र्यांनी दिलेली ही पहिलीच भेट आहे. राज्यातील युवकांना उत्तम दर्जाचे कृषी शिक्षण देताना अद्ययावत सुविधांचा लाभ मिळणार यासाठी सरकार प्रयत्नशील आहे. हा भव्य असा परिसर असणार असून लवकरच या महाविद्यालयाचे काम पूर्ण होईल याची खात्री असल्याचे डॉ. सावंत यांनी सांगितले.

पदव्युत्तर पदवी अभ्यासक्रम सुरू करणार

गोवा कृषी महाविद्यालयासाठी नवीन प्रशस्त इमारत बांधली जाणार आहे. स्थानिकांना मासेमारीचे अत्याधुनिक पद्धतीने मासेमारी करण्याचे केंद्र सुरू केले जाणार आहे. यानिमित्ताने ही पाहणी करण्यात आली आहे. कृषी महाविद्यालयात येत्या जूनपासून पदव्युत्तर पदवी अभ्यासक्रम सरकार सुरू करणार आहे. त्याची पूर्वतयारी म्हणून ही इमारत बांधली जात आहे.