गोवा राज्यात कला अकादमीच्या नूतनीकरणावरुन गेले काही दिवस आरोप - प्रत्यारोप सुरु असताना कला अकादमीचे काम नोव्हेंबर अखेर पुर्ण कले जाईल, तसेच हा परिसर 8 डिसेंबरपर्यंत वापरासाठी सज्ज होईल, अशी माहिती मुख्यमंत्र्यांनी आज दिली. मुख्यमंत्री प्रमोद सावंत यांच्यासह कला आणि संस्कृती मंत्री गोविंद गावडे यांनी कला अकादमीच्या सुरू कामाची पाहणी केली. यावेळी मुख्यमंत्र्यांनी ही माहिती दिली आहे.

(cm Pramod Sawant inform Enter Renovated Kala Academy will be ready for use before Dec 8 )

याबाबत बोलताना मुख्यमंत्री म्हणाले की, नूतनीकरण केलेल्या कला अकादमीचा संपूर्ण परिसर 8 डिसेंबरपर्यंत वापरासाठी सज्ज होईल, यातील मुख्य सभागृह वगळता कला अकादमीचा इतर सर्व परिसर 20 नोव्हेंबरपूर्वी वापरासाठी तयार होतील आणि इफ्फीसाठी वापरला जाईल. तसेच मुख्य सभागृह 8 डिसेंबरपूर्वी तयार होईल आणि 8 डिसेंबर ते 11 डिसेंबर या कालावधीत जागतिक आयुर्वेद काँग्रेस आयोजित करण्यासाठी त्याचा वापर केला जाईल, असेही ते म्हणाले.

8 ते 11 डिसेंबर या कालावधीत आयुर्वेद काँग्रेसचे आयोजन

येत्या डिसेंबरमध्ये गोव्यात नवव्या जागतिक आयुर्वेद काँग्रेसचे आयोजन करण्यात येणार आहे. 8 ते 11 डिसेंबर या कालावधीत ही आयुर्वेद काँग्रेसचे आयोजन करण्यात आले असुन त्यामध्ये देशातील 50 हून अधिक तज्ज्ञ आणि संस्था सहभागी होण्याची शक्यता आहे. हा कार्यक्रम कला अकादमीत नियोजित केला गेला असल्याने कला अकादमी नुतनीकरणास आता वेग येणार आहे.