Colvale Crime: कोलवाळ येथे अडीच लाखांचे अमली पदार्थ जप्त; एकाला अटक

कोलवाळ येथे पोलिसांनी अडीच लाखाचा गांजा बाळगणाऱ्या एकाला अटक केली आहे. ही कारवाई 20 ऑक्टोंबर रोजी रात्री करण्यात आली आहे. गोवा पोलिसांनी अमली पदार्थविरोधातील कारवाई वेगाने सुरु केली आहे. त्यामुळे गेल्या काही दिवसांपासुन राज्यात अमली पदार्थाविरोधातील कारवायांचा धडाका सुरु आहे.

( Bihar native arrested with Rs 2.5 lakh worth ganja from Colvale)

मिळालेल्या माहितीनुसार कोलवाळ पोलिसांना एक व्यक्ती कोलवाळ येथे गांजा विकण्यासाठी येणार असल्याची माहिती मिळाली होती. मिळालेल्या माहितीवरुन पोलिसांनी कोलवाळ परिसरात सापळा रचला असता यावेळी अनिकेत कुमार या मुळचा बिहारचा रहिवासी असणाऱ्या 23 वर्षीय संशयिताला अटक केली आहे.

या कारवाईत कोलवाळ पोलिसांनी सुमारे 2.50 लाख रुपयांचा गांजा जप्त केला आहे. संशयित आरोपी हा चार रस्ता जंक्शन, कोलवाळ बार्देश येथे गांजा पोहोचवण्याच्या प्रयत्नात असताना पोलिसांनी त्याला अटक केली आहे. पोलिसांनी संशयित आरोपीने आणखी काही ठिकाणी अशा प्रकारे गांजा पोहोच करण्यात सहभाग घेतला आहे का? याचा तपास सुरु असल्याची माहिती दिली आहे.