पणजी, ता. २१ (प्रतिनिधी) ः २०२१-२२ या आर्थिक वर्षात राज्याला ४,३०३ कोटी रुपये जीएसटी महसूल केंद्राकडून मिळाला आहे. तर याच आर्थिक वर्षातील एप्रिल ते जून या दरम्यान १,३८९ कोटी निधी मिळाला असल्याची माहिती मुख्यमंत्री प्रमोद सावंत यांनी दिली.

वास्कोचे आमदार कृष्णा ऊर्फ दाजी साळकर यांनी मांडलेल्या लक्ष्यवेधी सूचनेला उत्तर देताना ते बोलत होते. साळकर यांनी जीएसटी महसूल गळतीसंदर्भात चिंता व्यक्त केली. थोडीशीही महसूल गळती झाल्यास गोव्याला त्याचा फटका बसणार आहे. कारण गोवा हे लहान राज्‍य आहे, असे साळकर म्हणाले.

एसजीएसटी, आयजीएसटी आणि व्हॅट यांना एकत्रित करून महसूल गोवा राज्याला मिळतो. सध्या नवीन आर्थिक वर्ष सुरू झाले असून, अजून नऊ महिने शिल्लक आहेत. 2020 मध्ये कोरोनाचे संकट सुरु झाल्यानंतर थोडा फरक पडला होता, असेही मुख्यमंत्री प्रमोद सावंत म्हणाले.