राज्यात सध्या सेंट फ्रान्सिस झेवियर यांच्या शव प्रदर्शन सोहळ्याची लगबग सुरु आहे. शव प्रदर्शन सोहळ्याच्या तयारीच्या अनुषंगाने राज्याचे मुख्यमंत्री डॉ. प्रमोद सावंत यांच्या अध्यक्षतेखाली आज (3 नोव्हेंबर) आयोजन समितीची बैठक पार पडली. यावेळी या बैठकीसाठी राज्याचे पर्यावरण मंत्री आलेक्स सिक्वेरा देखील उपस्थित होते. येत्या 15 नोव्हेंबर पर्यंत सेंट फ्रान्सिस झेवियर यांच्या सोहळ्यासंबंधी कामे पूर्ण होतील, असे मुख्यमंत्री सावंत यांनी यावेळी सांगितले.

90 टक्के कामे पूर्ण

मुख्यमंत्री सावंत यांनी सांगितले की, 'सोहळ्यासंबंधी आतापर्यंत 90 टक्के कामे पूर्ण झाली आहेत. मोठ्या दिमाखात यंदाचा सोहळा साजरा केला जाईल. सोहळ्यासाठी हजेरी लावणाऱ्या भाविकांसाठी कदंब गाड्यांची व्यवस्था करण्यात येईल. तसेच, रस्त्याची अर्धवट राहिलेली काम देखील लवकरात-लवकर पूर्ण होतील. यावेळी 200 जणांना व्हीआयपी पास देण्यात येतील.'

कधी होतोय सोहळा?

गोव्यात या वर्षी 21 नोव्हेंबर 2024 ते 4 जानेवारी 2025 या कालावधीत सेंट फ्रान्सिस झेवियर यांचा अवशेष दर्शन सोहळा पार पडणार आहे. या सोहळ्यासाठी देश विदेशातील पर्यटक भेट देतील. सरकार या सोहळ्यासाठी जय्यत तयारी करत असून, यासाठी 400 कोटी रुपयांपर्यंत खर्च अपेक्षित आहे. सोहळ्यासाठी पोपना देखील निमंत्रण देण्यात आल्याची माहिती मुख्यमंत्री डॉ. प्रमोद सावंत यांनी दिली.

भाविकांसाठी नोंदणी

राज्य सरकार सेंट फ्रान्सिस झेवियर अवशेष दर्शन सोहळ्यासाठी संकेतस्थळाची निर्मिती करणार असून, भाविकांना यावर नोंदणी करता येईल. या सोहळ्यासाठी भाजप सरकार आवश्यक पायाभूत सुविधा निर्माण करण्यासाठी प्रामुख्याने विचार करत असल्याचे सांवत यांनी यावेळी नमूद केले.