Churchill Alemao: बाणावलीचे माजी आमदार चर्चिल आलेमाव यांनी ऑगस्ट महिन्यात तृणमूल काँग्रेस पक्षाचा राजीनामा दिला होता. राजीनामा दिल्यानंतर आलेमाव यांचे पुढचे राजकीय पाऊल काय असेल याकडे सर्वांचे लक्ष लागले होते.

कोणत्याही पक्षात सामिल होण्याचा दावा देखील त्यांनी खोडून काढला होता, दरम्यान, आता आलेमाव यांनी पुढील राजकीय प्रवासाबाबत मोठी घोषणा केली आहे.

चर्चिल आलेमाव यांनी आगामी लोकसभा निवडणूक अपक्ष लढविण्याचा निर्धार केला आहे. लोकांचा मला पाठिंबा असल्याने मी निवडणूक लढविणार असल्याचे आलेमाव यांनी म्हटले आहे. त्यामुळे लोकसभेच्या लढाईत गोव्यातून आणखी एक मोठे राजकीय व्यक्तीमत्व आता मैदानात उतरले आहे.

आलेमाव यांनी ममता दिदींच्या तृणमूल काँग्रेसला राम राम ठोकल्यानंतर ते राष्ट्रवादी अजितदाद गटासोबत जातील अशी चर्चा रंगली होती. मात्र, आलेमाव यांनी हे दावे फेटाळून लावले.

तृणमूलमधून बाहेर पडल्यानंतर आलेमाव यांनी अजितदादा गटाचे प्रफुल्ल पटेल यांची भेट घेतली होती. आलेमाव आता राष्ट्रवादीसोबत जाणार अशा चर्चांना उधाण आले होते.

दरम्यान, पटेल यांच्यासोबत झालेली भेट राजकीय नव्हती तसेच, राष्ट्रवादीसोबत जाण्याचा कोणताही विचार सध्या नाही असे स्पष्टीकरण आलेमाव यांनी यावेळी दिले होते.