Churchill Alemao on Mann Ki Baat@100: आज रविवार 30 एप्रिलला पंतप्रधान नरेंद्र मोदी यांचा शंभरावा ‘मन की बात’ कार्यक्रम पार पडला. हा कार्यक्रम गोव्यातील अनेक नेत्यांनी पाहिला. यानंतर काहींनी आपली प्रतिक्रिया व्यक्त केली आहे. याबाबत चर्चिल आलेमाव यांनीही आपले मत व्यक्त केले आहे. ‘मन की बात’च्या शंभराव्या भागानंतर चर्चिल यांनी पंतप्रधान नरेंद्र मोदींचे कौतुक केले आणि असा पंतप्रधान याआधी पहिला नसल्याचे मत व्यक्त केले.

यावेळी मत व्यक्त करताना ते म्हणाले की, भाजपचे काम मला आवडते. जरी मी तिकडे प्रवेश केला नसला तरीही त्यांच्या कामाची कल्पना मला आहे. भाजप हा सर्व धर्मांना समान मानणारा पक्ष आहे.

ते पुढे म्हणाले की, कुडतरी हा माझा मतदारसंघ असून इथून मी कधीही निवडून येऊ शकतो कारण कुडतरीचे लोक माझ्यावर प्रेम करतात. शिवाय मी आपल्या देशाचे पंतप्रधान नरेंद्र मोदींचा मोठा चाहता आहे, मी त्यांच्यासारखा पंतप्रधान कधीच पाहिला नाही.

हल्लीच चर्चिल आलेमाव यांनी राज्यांतील तसेच केंद्रातील भाजप सरकारचे गोडवे गाताना लोकसभा निवडणुकीत दोन्ही जागांवर भाजप जिंकून येईल असे भाकीत केले होते. या नंतर चर्चिल भाजप पक्षात सामील होतील या चर्चेने जोर धरला होता.

चर्चिल आलेमाव हे सुरुवातीपासून भाजप पक्षाचे 'वेल व्हिशर' आहेत पण भाजप प्रवेश करण्याबाबत त्यांनी अजून तरी कोणतेही संकेत दिलेले नाहीत असा खुलासा भाजप प्रदेशाअध्यक्ष सदानंद तानावडे यांनी केला आहे. त्यामुळे खरंच चर्चिल आलेमाव हे भाजपमध्ये प्रवेश करण्याच्या तयारीत आहेत का अशी चर्चा सध्या राजकीय वर्तुळात सुरू आहे.