पणजी : चिंबल येथील प्रस्तावित युनिटी मॉल आणि प्रशासन स्तंभ प्रकल्प रद्द करावेत, या मागणीवर उपोषणकर्ते ठाम आहेत. याबाबत सरकारकडून अधिकृत निर्णय जाहीर झाल्याशिवाय त्या जागेवरून न हटण्याची भूमिका त्यांनी घेतली आहे. २१ दिवसांपासून त्यांचे उपोषण सुरू आहे.

पर्वरी वेलफेअर ग्रुपचे विकास प्रभुदेसाई यांच्यासह त्यांच्या सहकाऱ्यांनी उपोषणकर्त्यांची भेट घेऊन त्यांना पाठिंबा दिला. प्रभुदेसाई यांनी सांगितले की, एका मंत्र्याच्या मतदारसंघातील लोकांनाही अशाच त्रासाला सामोरे जावे लागत आहे.

चिंबल ग्रामस्थांनी तोयार तलाव आणि त्याच्या जैवविविधतेचे संरक्षण करण्याच्या उद्देशाने जो लढा उभारला आहे, तो खरोखर इतरांसाठी प्रेरणादायी आहे. उपोषणकर्त्यांनी तलावाच्या परिसरात आढळणाऱ्या औषधी वनस्पतींचे अनेक नमुने गोळा केले, जे नंतर आंदोलनस्थळी प्रदर्शित करण्यात आले.

दरम्यान, विधानसभेवर काढलेल्या मोर्चावेळी मुख्यमंत्र्यांनी दिलेल्या आश्वासनामुळे सोमवार किंवा मंगळवारी या प्रकल्पाचा निर्णय होऊ शकतो. त्यानंतरच पुढील आंदोलनाची दिशा ठरवली जाईल, असे उपोषणकर्त्यांनी सांगितले. त्‍यांनी गुरुवारी विधानसभेवर मोर्चा काढला होता, परंतु अधिवेशन सुरू असल्याने पोलिसांनी हा मोर्चा मेरशी चौकातच अडवला होता.