वास्को: मिरची व्यवसायामध्ये मोठा नफा मिळेल, अशी ग्वाही देऊन मोठी रक्कम गुंतविण्यास प्रवृत्त करून आपली फसवणूक केल्याची तक्रार झुआरीनगर येथील नागराज यांनी वेर्णा पोलिस स्थानकात केली आहे. वेर्णा पोलिसांनी याप्रकरणी पुणे येथील साळुंके यांच्या विरोधात गुन्हा दाखल केला आहे.

नागराज व पुणे येथील साळुंके हे दोघेही व्यावसायिक आहेत. त्यामुळे ते दोघे एकमेकांच्या संपर्कात आले होते. सांळुके यांनी नागराज यांना हिरव्या मिरच्यांना दुबई येथे मोठी मागणी आहे. त्यामुळे हिरव्या मिरच्यांना चांगला दर मिळत आहे. हिरव्या मिरच्या निर्यात करण्याच्या व्यवसायात गुंतवणूक केल्यास मोठा नफा मिळू शकतो, अशी ग्वाही दिली होती.

साळुंके यांनी प्रवृत्त केल्याने नागराज यांनी २ सष्टेंबर २०२४ ते १९ सष्टेंबर २०२४ या दरम्यानच्या काळात दहा लाख साठ हजार रुपयांची गुंतवणूक केली होती. त्यानंतर साळुंके यांनी नागराज यांच्या माहितीशिवाय व संमतीशिवाय बनावट सह्या करून व नागराजाचा शिक्का वापरून कागदपत्रे तयार केली.

त्या बनावट कागदपत्रांचा वापर करून हिरव्या मिरच्या दुबईला पाठविल्या. त्यानंतर साळुंके हे दुबईला गेले. तेथे गेल्यावर काही दिवसांनंतर त्यांनी नागराज यांच्याशी संपर्क साधला. दुबईत स्वस्त दरात मिरच्या विकल्याने नागराज यांचे सुमारे नऊ लाखांचे नुकसान झाले.