Goa Crime News: सेल्फ डिफेन्सचे प्रशिक्षण देण्याच्या नावाखाली प्रशिक्षण घेण्यासाठी येणाऱ्या मुलांचे लैंगिक शोषण करणाऱ्या संशयित कपिल देऊलकर याच्याविरुद्ध पणजी महिला पोलिसांनी बाल न्यायालयात दोन वेगवेगळी आरोपपत्रे दाखल केली आहेत, अशी माहिती वरिष्ठ पोलिस अधिकाऱ्यांनी दिली.

महिला पोलिसांनी संशयित कपिल देऊलकर याच्याविरुद्ध चार विविध ठिकाणी प्रशिक्षण देत असलेल्या मुलांचे लैंगिक शोषण केल्याप्रकरणी वेगवेगळे गुन्हे दाखल केले होते.

तीन प्रकरणांत त्याच्याविरुद्ध, तर चौथ्या प्रकरणात त्याच्यासह संशयित राज च्यारी व इतर दोघांविरुद्ध गुन्हा दाखल झालेला आहे. या सर्व गुन्ह्यांतील संशयित सध्या न्यायालयीन कोठडीत आहेत. हा गुन्हा गंभीर असल्याने संशयिताकडून जामिनासाठी अर्ज केलेला नाही.

न्यायालयात संशयित कपिल देऊलकर याच्याविरुद्ध 53 पानी आरोपपत्र दाखल असून त्यामध्ये डॉक्टर्स, चाईल्डलाईन (एनजीओ) पदाधिकारी, मुलांचे पालक तसेच तपास अधिकारी मिळून 13 साक्षीदार आहेत. दुसरे दाखल केलेले आरोपपत्र 48 पानी असून तेसुद्धा संशयित कपिल देऊलकर याच्याविरुद्ध आहे. त्यामध्येही 13 साक्षीदार आहेत.

अबकारी सुरक्षा रक्षकाला अटक

या लैंगिक शोषण प्रकरणातील चौथ्या गुन्ह्यामध्ये संशयित रामा सामंत व शशिकांत कांबळे या दोघांना अटक करण्यात आली असून न्यायालयाने त्यांना 2 दिवसांची पोलिस कोठडी दिली आहे. संशयित रामा सामंत हा अबकारी खात्यामध्ये सुरक्षारक्षक कामाला आहे. त्याच्या अटकेची माहिती खात्याला देण्यात आली आहे, अशी माहिती महिला पोलिस स्थानक अधिकाऱ्यांनी दिली.