वास्को: चिखली येथील रिचर्ड व राजेश्वरी या पतीपत्नीने जहाजावर नोकरी देण्याचे आश्वासन देऊन २४ लाख ९४ हजार रुपये घेऊनही नोकरी न दिल्याप्रकरणी वाडे येथील एका व्यक्तीने वास्को पोलिस स्थानकात तक्रार केली आहे. वास्को पोलिसांनी या दाम्पत्याविरोधात गुन्हा दाखल केला आहे.

या दाम्पत्याने जुना फ्लॅट देण्याचे आश्वासन सुमारे पावणे सव्वीस लाख रुपये घेतल्याप्रकरणी गेल्या २४ डिसेंबरला नवे वाडे येथील एका व्यक्तीने वास्को पोलिस स्थानकात तक्रार केली होती. पोलिसांनी दिलेल्या माहितीनुसार , सदर दाम्पत्याने वाडे येथील एक व्यक्तीला एका जहाजावर नोकरी देण्याचे आश्वासन देऊन जानेवारी २०२३ ते ऑगस्ट २०२४ दरम्यान २४ लाख ९४ हजार ६४९ रुपये घेतले होते.

त्यानंतर नोकरीही दिली नाही. तसेच घेतलेली रक्कम देण्याचेही टाळले होते. आपली फसवणूक झाल्याचे लक्षात येताच सदर व्यक्तीने वास्को पोलिस स्थानकात तक्रार केली. याप्रकरणी वास्को पोलिस स्थानकाचे पोलिस उपनिरीक्षक प्रिस्ली कार्वालो पुढील तपास करीत आहेत.

या पतीपत्नीने नवे वाडे येथील एका व्यक्तीला वापरात असलेला टू बीएचके फ्लॅट देण्याचे आश्वासन देऊ २५ लाख ७४ हजार रुपये घेतले होते. त्यानंतर सदर फ्लॅटही दिला नाही तसेच घेतलेली रक्कमही परत केली नाही. सदर रक्कम डिसेंबर २०२२ ते डिसेंबर २०२३ या दरम्यान घेतली होती. दोन्ही प्रकरणात वास्को पोलिस तपास करीत आहेत.