पणजी: भटक्या कुत्र्यांच्या नियंत्रणासाठी राबविण्यात येत असलेल्या उपाययोजनांचा आढावा मुख्य सचिव डॉ. व्ही. कंदवेलू यांनी मंगळवारी सचिवालयातील उच्चस्तरीय बैठकीत घेतला. राज्यातील भटक्या कुत्र्यांच्या वाढत्या समस्येवर सर्वोच्च न्यायालयाने दिलेल्या निर्देशांच्या अंमलबजावणीसह विविध नागरी व प्रशासकीय विषयांचा आढावा या बैठकीत घेण्यात आला.

या बैठकीला विविध विभागांचे सचिव, विभागप्रमुख तसेच वरिष्ठ पोलीस व प्रशासकीय अधिकारी उपस्थित होते. बैठकीत राज्यातील भटक्या कुत्र्यांच्या वाढत्या संख्येमुळे नागरिकांच्या सुरक्षेसमोर निर्माण झालेल्या आव्हानांवर सविस्तर चर्चा करण्यात आली. सर्वोच्च न्यायालयाच्या आदेशानुसार स्थानिक स्वराज्य संस्था, पशुसंवर्धन विभाग व संबंधित यंत्रणांनी समन्वयाने कार्य करून प्रभावी उपाययोजना राबवाव्यात, यावर भर दिला. भटक्या कुत्र्यांचे निर्बिजीकरण, लसीकरण व त्यांचे व्यवस्थापन यासंदर्भातील उपाययोजनांचाही आढावा घेतला.

महत्त्वाच्या विषयांवर चर्चा

बैठकीत लवकरच होणाऱ्या संसदीय सामाजिक न्याय समितीच्या गोवा दौऱ्याच्या पार्श्वभूमीवर करण्यात येणाऱ्या तयारीचाही आढावा घेण्यात आला. समितीसमोर विविध कल्याणकारी योजनांची माहिती प्रभावीपणे मांडण्यासाठी संबंधित विभागांना आवश्यक सूचना देण्यात आल्या.

तसेच आगामी आंतरराष्ट्रीय योग दिनाच्या आयोजनासंदर्भातील तयारी, विविध कार्यक्रमांचे नियोजन व नागरिकांच्या सहभागाबाबत चर्चा करण्यात आली. याशिवाय नीती आयोगाच्या गव्हर्निंग कौन्सिलशी संबंधित विषयांवरही विचारविनिमय करण्यात आला.

राज्य प्रशासनाशी निगडित महत्त्वाच्या विषयांचा नियमित आढावा घेऊन विविध विभागांमध्ये समन्वय वाढविण्याच्या दृष्टीने अशा बैठका महत्त्वाच्या असल्याचे यावेळी अधोरेखित केले. प्राधान्यक्रमातील विषयांवर वेळेत प्रभावी अंमलबजावणी सुनिश्चित करण्यावर बैठकीत भर दिला.

घनकचरा व्यवस्थापन मजबूत करणार

याशिवाय राज्यात घनकचरा व्यवस्थापन नियमांची प्रभावी अंमलबजावणी करण्याबाबतही चर्चा झाली. विविध नगरपालिका, पंचायत व संबंधित विभागांनी कचरा संकलन, वर्गीकरण आणि विल्हेवाट प्रक्रियेत अधिक कार्यक्षमतेने काम करण्याच्या सूचना देण्यात आल्या. सार्वजनिक ठिकाणी कचरा टाकण्याच्या घटनांवर नियंत्रण आणण्यासाठी व पर्यावरणीय स्वच्छता राखण्यासाठी कठोर उपाययोजनांवर भर देण्यात आला.