Goa Government Jobs Recruitment CM Pramod Sawant

पणजी : राज्याचे मुख्यमंत्री डॉ. प्रमोद सावंत यांनी मोठी घोषणा केली आहे. येत्या वर्षात सरकारी खात्यांतील तब्बल 2500 रिक्त पदे लवकरात लवकर भरण्यात येतील. याशिवाय, 'खाजन विकास आणि संवर्धन मंडळ' स्थापन करुन खाजन जमिनींच्या संवर्धन करण्यात येईल अशी माहिती खुद्द मुख्यमंत्र्यांनी दिली.

दरम्यान, स्वातंत्र्यदिनानिमित्त (15 ऑगस्ट) राजधानी पणजी येथील सचिवालयासमोर आयोजित राज्यस्तरीय कार्यक्रमात मुख्यमंत्री डॉ. प्रमोद सावंत बोलत होते. यावेळी उत्तर गोव्याचे खासदार आणि केंद्रीय मंत्री श्रीपाद नाईक, विरोधी पक्षनेते युरी आलेमाव, भाजपचे प्रदेशाध्यक्ष आणि राज्यसभा खासदार सदानंद शेट तानावडे, मंत्री बाबूश मोन्सेरात आदी मान्यवर उपस्थित होते.

मुख्यमंत्री सावंत म्हणाले की, गोव्याचा (Goa) विकास झपाट्याने होत आहे. 2047 पर्यंत पीएम मोदी यांनी देशाला विकसित करण्याचे स्वप्न पाहिले आहे. त्यामुळे विकसित गोवा आणि विकसित भारतासाठी गोमंतकीयांनी पूर्ण योगदान दिले पाहिजे.

सावंत पुढे म्हणाले की, सध्या राज्यातील शिक्षण क्षेत्रात अमूलाग्र बदल होतायेत. राज्यातील तीन लाखांहून अधिक विद्यार्थ्यांना त्याचा फायदा होतोय. सरकार (Government) विद्यार्थ्यांना कौशल्यपूर्ण शिक्षण देऊन स्वयंपूर्ण बनवण्याच्या निर्धाराने काम करतेय. त्यासाठी येत्या काळात राज्यातील आयटीआय अपग्रेड करण्यात येतील. तिथे आधुनिक तंत्रज्ञानाची उभारणी करण्यात येईल.