मडगाव: दारूच्या नशेत झालेल्या किरकोळ वादाचे रूपांतर थेट खुनात झाल्याची धक्कादायक घटना मोबोर किनारपट्टीवर घडली. जेवणाचे ताट लाथ मारून उडविल्याच्या कारणावरून झालेल्या भांडणात शशी लाक्रा (२७) या मजुराचा काचेची बाटली गळ्यात खुपसून खून करण्यात आला. या प्रकरणी कोलवा पोलिसांनी संजय मांझी, आशिष कुमार आणि जगनंदन सिदार या तिघांना अटक केली आहे. तिन्ही संशयित आणि मयत हे मूळ छत्तीसगड राज्यातील असून, ते बेतूल येथील एका ट्रॉलरवर काम करत होते.

पोलिसांनी दिलेल्या माहितीनुसार, संबंधित ट्रॉलर दुरुस्तीसाठी मोबोर येथे आणण्यात आला होता. शनिवारी रात्री ट्रॉलरवर सर्व मजूर जेवण घेत असताना शशी लाक्राने एका संशयिताचे जेवणाचे ताट लाथ मारून उडवले. त्‍यानंतर उभयतांमध्ये शाब्दिक बाचाबाची झाली. वाद हळूहळू वाढत गेला आणि त्यातून संशयितांनी काचेची बाटली शशीच्या गळ्यात खुपसल्याचा आरोप आहे. गंभीर जखमी झालेल्या शशीचा घटनास्थळीच मृत्यू झाला.

शशीचा मृत्यू झाल्याची खात्री झाल्यानंतर संशयितांनी त्याचा मृतदेह ट्रॉलरवरून खाली उतरवून काही अंतरावर नेऊन ठेवला, अशी माहिती पोलिस तपासातून पुढे आली आहे.काल रविवारी दुपारी अडीचच्या सुमारास मोबोर समुद्रकिनारी ‘द बायके हेरिटेज ओल्ड अँकर रिसॉर्ट’जवळ एका व्यक्तीचा मृतदेह पडल्याची माहिती पोलिसांना मिळाली.

कोलवा पोलिसांनी घटनास्थळी धाव घेऊन पंचनामा केला असता, मृताच्या गळ्यावर खोल जखम आढळली. त्यामुळे हा खुनाचा प्रकार असल्याचे स्पष्ट झाले. पोलिस निरीक्षक विदेश शिरोडकर यांच्या मार्गदर्शनाखाली पुढील तपास सुरू असून, मृतदेह दक्षिण गोवा जिल्हा रुग्णालयाच्या शवागारात ठेवण्यात आला आहे.

संशयित रातोरात जेरबंद

घटनास्थळी तपास सुरू केल्यानंतर पोलिसांनी रविवारी रात्रीच तिन्ही संशयितांना अटक केली. त्यांच्याविरोधात भारतीय न्याय संहितेच्या कलम १०३ तसेच २३८ (३) आणि (५) अंतर्गत गुन्हा नोंद करण्यात आला आहे. आज सोमवारी न्यायालयात हजर केले असता त्‍यांना दहा दिवसांची पोलिस कोठडी सुनावण्यात आली.