मोरजी: चांदेल हसापूरचे सरपंच प्रजय मळीक यांना सरकारी नोकरी मिळाल्यानंतर त्यांनी सरपंचपदाबरोबरच पंच सदस्याचाही राजीनामा पंचायत संचनालयाकडे सादर केला आहे.

सहा महिन्यापूर्वी प्रजय मळीक यांची सरपंचपदी निवड झाली होती. त्यासाठी मोठे राजकारण घडले होते. तुळशीदास गावस यांच्यावर अविश्वास ठराव आणून त्यांना खाली खेचण्यात आले होते. त्यानंतर मळीक यांची या पदावर बिनविरोध निवड झाली होती.

एकूण पाच सदस्य असलेल्या या पंचायत मंडळातील एका सदस्याने राजीनामा दिल्याने आता सरपंचपदावर कोणाची वर्णी लागणार या विषयी उत्सुकता निर्माण झाली आहे. नवा सरपंचासाठी रस्सीखेच सुरू झाली आहे.

मळीक यांनी राजीनामा दिल्याने त्या प्रभागात पोटनिवडणूक घ्यावी लागणार आहे. आता या प्रभागातून कोण रिंगणात उतरणार याबाबतही उत्सुकता आहे.