पणजी: गोव्यातील प्रमुख नद्यांमध्ये केंद्रीय जल आयोगाकडून नदी प्रवाह व पाण्याच्या वेगाचे सर्वेक्षण हाती घेण्यात येणार आहे. नदीपात्रांमध्ये प्रत्यक्ष जाऊन नदी प्रवाह आणि पाण्याच्या वेगाची मोजणी केली जाणार आहे. माहितीनुसार, २८ मे रोजी पणजीजवळील मांडवी नदी परिसर आणि फिशरीज जेटी येथे मोजणी करण्यात येणार आहे.

२९ मे रोजी केरी येथे तेरेखोल नदीत, आरोंदा-किरणपाणी पुलाच्या सुमारे १०० मीटर खालच्या बाजूस सर्वेक्षण होणार आहे. तर ३० मे रोजी दोन ठिकाणी अभ्यास करण्यात येणार असून, कोळवाळ-धारगळ पुलाच्या सुमारे २०० मीटर वरच्या बाजूस शापोरा नदीत तसेच बोरी पुलाच्या सुमारे २०० मीटर खालच्या बाजूस झुआरी नदीत मोजणी केली जाणार आहे. आयोगातर्फे येत्या काही दिवसांत गोव्यातील विविध नदी परिसरांमध्ये हे सर्वेक्षण करण्यात येणार आहे.

या अभ्यासातून मान्सूनपूर्व नदी प्रवाहाची मूलभूत माहिती संकलित करण्यात येणार असून, भविष्यातील पूरपूर्व अंदाज, जलसंपदा व्यवस्थापन तसेच पर्यावरणीय अभ्यासासाठी ही माहिती महत्त्वाची ठरणार आहे. या पार्श्वभूमीवर बंदर कप्तान खात्याने सर्व जहाजे, बार्ज, मासेमारी नौका आणि प्रवासी बोटींसाठी सावधानतेचा इशारा जारी केला आहे. या कालावधीत सर्व नौकांनी गती कमी ठेवावी, अभ्यास कार्यात अडथळा येणार नाही याची दक्षता घ्यावी, असे कळविले आहे.

आपत्ती व्यवस्थापनासाठीही माहिती उपयुक्त

केंद्रीय जल आयोगाच्या या उपक्रमामुळे राज्यातील नदीप्रवाहाच्या स्वरूपाचा अधिक अचूक अभ्यास होण्यास मदत होणार असून, भविष्यातील आपत्ती व्यवस्थापनासाठीही ही माहिती उपयुक्त ठरणार असल्याचे सांगण्यात आले.