Gauri Achari Case : गौरी आचारी खून प्रकरणातील संशयित गौरव बिद्रे याला कोलवाळ कारागृहातील कैद्यांनी केलेल्या मारहाणप्रकरणी प्रधान जिल्हा व सक्ष न्यायाधीश शेरीन पॉल यांनी जेलरला याप्रकरणी उत्तर सादर करण्याचे निर्देश दिले होते.

दरम्यान यावरील सुनावणी आज 30 जानेवारीला झाली. संशयित गौरव बिद्रे याला कोलवाळ कारागृहात मारहाण झाल्या प्रकरणी छोटू शेख व सादीक छोटू या कैद्यांविरोधात कोलवाळ पोलिसांत गुन्हा नोंद करण्यात आला आहे. याबाबतची माहिती जिल्हा न्यायालयात सुनावणीवेळी सरकारी पक्षाकडून देण्यात आली.

मागील सुनावणीवेळी संशयित गौरव बिद्रे याने न्यायालयात दोन वेगवेगळे अर्ज सादर केले आहेत. एका अर्जात त्याने कारागृहात असलेल्या सौझा लोबो रेस्टॉरंट तोडफोड प्रकरणातील संशयित छोटू व इतर दोघे मिळून तिघांनी मारहाण केल्याची तक्रार केली होती.

या मारहाणीमुळे त्याचे पुढील दोन दात तुटले होते. दुसऱ्या अर्जात त्याने दात तुटल्याने त्यावरील उपचार करण्यासंबंधी निर्देश द्यावेत, अशी विनंती केली होती. ती न्यायालयाने स्वीकारली तसेच मारहाणप्रकरणी जेलरला उत्तर सादर करण्याचे निर्देश दिले होते.