मडगाव: साधू, भटजीबाबत आक्षेपार्ह विधान करुन हिंदूंच्या धार्मिक भावना दुखावल्याप्रकरणी एकाविरोधात गुन्हा नोंद करण्यात आला आहे. सोशल मिडियावर व्हिडिओ प्रसिद्ध करत साधू आणि भटजीविरोधात आक्षेपार्ह वक्तव्य केल्याचा आरोप तक्रारीत करण्यात आला आहे.

चिंचणी येथील माल्कम परेरा यांनी याप्रकरणी अँथनी डिसिल्वा (आंबेली, असोळणा) यांच्या विरोधात कुंकळ्ळी पोलिसांत तक्रार दाखल केली आहे. डिसिल्वा यांनी एका व्हिडिओद्वारे साधू, भटजीबाबत आक्षेपार्ह विधान करुन हिंदूंच्या भावना दुखावल्या आहेत. तसेच, हा व्हिडिओ समाजमाध्यमांवर प्रसिद्ध करुन व्हायरल केल्याचा आरोप त्यांच्यावर ठेवण्यात आला आहे.

धार्मिक तेढ निर्माण करुन दोन समाजात फूट पाडण्याचा प्रयत्न डिसिल्वा यांनी केल्याचा आरोपही परेरा यांनी केला आहे. पोलिसांनी तक्रारीच्या आधारे चितावणीखोर वक्तव्य करणे, धार्मिक भावना दुखावणे तसेच समाजाचा एकोपा धोक्यात आणण्याची कृती करणे याप्रकरणी अँथनी यांच्या विरोधात गुन्हा नोंद केला आहे. कुंकळ्ळी पोलिस याप्रकरणाचा अधिक तपास करतायेत.