Burning Car in Mapusa: आज (02 जुलै) पहाटे करासवाडा, म्हापसा येथील उड्डाणपुलावर एका कारला भीषण आग लागण्याची घटना घडली आहे. यामध्ये कार पूर्ण जाळून खाक झाली असल्याचे अग्निशमन दलाच्या जवानांनी सांगितले.

संपूर्ण माहिती अशी की, कोलवाळच्या दिशेने चाललेल्या GA03H.9405 फोर्ड फिगो कारला पुलावर असताना अचानक आग लागली. आग इतकी भीषण होती की थांबण्याचे कोणतेही चिन्ह दिसेना. यानंतर अग्निशमन दलाला बोलावण्यात आले. मात्र कार पूर्णपणे जळून खाक झाली होती.

या घटनेत जवळपास तीन लाखांचे नुकसान झाले असून तीस हजारांपर्यंतचे नुकसान वाचवण्यात यश आले असल्याची माहिती अग्निशमन दलाच्या जवानांनी दिली. सुदैवाने यामध्ये कोणतीही जीवितहानी झाली नाही.

मात्र आग लागण्यामागील नेमके कारण अद्याप कळू शकले नाही.