Pernem Excise Scam: काँग्रेस आक्रमक; "त्या प्रकरणाला आयुक्तही जबाबदार, त्यामुळे अटक..

Pernem Excise Scam पेडणे अबकारी कार्यालयात झालेल्या सुमारे दोन कोटी रुपयांच्या अफरातफर प्रकरणी काँग्रेस प्रवक्ते संजय बर्डे यांनी आज खात्याचे आयुक्त नारायण गाड यांच्याविरोधात पेडणे पोलिसांत तक्रार करून त्यांना अटक करण्याची मागणी केली.

सदर तक्रारीत बर्डे यांनी म्हटले आहे की, खोटे शिक्के व कागदपत्रे तयार करून त्‍याचा दुरूपयोग करणे हा मोठा गुन्हा ठरतो.

नारायण गाड यांनी अबकारी खात्याचे आयुक्त म्हणून पदभार स्वीकारल्यानंतर पेडणे अबकारी कार्यालयाचे ऑडीट का झाले नाही याची चौकशी करणे त्‍यांचे कर्तव्‍य होते. पण ते त्यांनी पार पाडले नाही.

दोन कोटींच्‍या घोटाळ्‍यात हरीश नाईक याचे नाव समोर आल्‍यानंतर गाड यांनी पेडणे येथे येऊन अफरातफर केलेल्या या कर्मचाऱ्याविरोधात पोलिस तक्रार करून त्‍याला निलंबित करणे आवश्यक होते. पण तसे न करता त्‍यांनी त्‍या कर्मचाऱ्याची बदली सत्तरी अबकारी कार्यालयात केली व अबकारी निरीक्षकांना मात्र निलंबित केले.