मडगाव: काणकोणमधील ड्रग्सप्रकरणात आंतरराष्ट्रीय नायजेरियन कनेक्शन उघडकीस आले आहे. पोलिसांनी नायजेरियातील एका इसमाला अटक करत तब्बल १ कोटी १० लाख रुपये किमतीचे कोकेन जप्त केले.

ओनेयेचोले फ्रायडे (४७) असे अटक करण्यात आलेल्या ड्रग्स पेडलरचे नाव असून, या कारवाईमुळे काणकोण परिसरात सुरू असलेल्या ड्रग्सच्या जाळ्याचा पर्दाफाश झाला आहे. फ्रायडे याच्याकडून एकूण २१९.९ ग्रॅम कोकेन जप्त करण्यात आले आहे, त्याची बाजारभावानुसार किंमत १ कोटी ९ लाख ९५ हजार रुपये आहे.

यापूर्वी अटक करण्यात आलेल्या वॉल्टर फर्नांडिस याच्याशी या नायजेरियन संशयिताचा संबंध असल्याचा संशय पोलिसांना असून, या आंतरराष्ट्रीय ड्रग्स रॅकेटचा सखोल तपास सुरू आहे. दक्षिण गोवा पोलिस मुख्यालयात आयोजित पत्रकार परिषदेत बोलताना वर्मा यांनी, हे अमली पदार्थ नेमके कुठून आणि कशा मार्गाने गोव्यात आणले जातात, याचा तपास सुरू असल्याचे सांगितले.

काणकोण पोलिसांनी मंगळवारी वॉल्टर फर्नांडिस (४९) याला अटक करून एमडीएमए, चरस व कोकेन असा एकूण ५ लाख २५ हजार रुपये किमतीचा मुद्देमाल जप्त केला होता. याच प्रकरणात सुमित बांदेकर (३२) यालाही अटक करण्यात आली आहे.

तो वॉल्टरकडून ड्रग्स घेत असल्याचे तपासात उघड झाले आहे. दोघांनाही पुढील चौकशीसाठी तीन दिवसांची पोलिस कोठडी सुनावण्यात आली आहे. फ्रायडे याला गुरुवारी न्यायालयात हजर करण्यात येणार आहे. त्‍याला काणकोणमधील तारीर-किंदळेबाग येथील एका हॉटेलमधून अटक करण्‍यात आली आहे.