Margao : चांदर येथे रेल रोको आंदोलनावेळी सार्वजनिक रस्ता अडविल्याबद्दल मायणा कुडतरी पोलीसांनी अभिजित प्रभुदेसाई आणि अन्य 9 जणांवर आरोपपत्र दाखल केले होते. त्याची सुनावणी आज मडगाव न्यायालयात होती.

यावेळी आपल्यावर दाखल केलेले आरोप रद्दबातल करण्यात यावेत अशी मागणी करणारा विनंती अर्जं आज मडगाव न्यायालयाला सादर करण्यात आला.

पोलीसांनी जे आरोपपत्र दाखल केले आहे ते चुकीचे आहे. जिल्हाधिकऱ्यांच्या आदेशाने हा रस्ता त्या दिवशी बंद ठेवण्यात आला होता. जो रस्ता आधीच वाहतुकीसाठी बंद केला होता तो परत अडवून अडथळे निर्माण करणे कसे शक्य आहे असा सवाल करीत आपल्यावर दाखल केलेले आरोप रद्दबातल करण्यात यावेत अशी मागणीचा विनंती अर्जात करण्यात आली आहे.

या प्रकरणी प्रभुदेसाई यांच्या व्यतिरिक्त कॅ. विरीयातो फर्नांडीस, डायना तावारीस, विकास भगत, फ्रेडी त्रावासो, सबिता मास्कारेन्हास, संदेश तेलेकर, रॉयला फर्नांडीस, क्रेसन आंताव व जॉन कुतीन्हो यांच्या विरोधात आरोपपत्र दाखल केले आहे. दरम्यान आता ही सुनावणी 1 मार्च रोजी होणार आहे.

पर्यावरणाच्या रक्षणासाठी वावरणाऱ्या कार्यकर्त्यांच्या मागे त्यांनी न केलेल्या कृत्याचेही आरोप ठेवून त्यांच्या विरोधात खटले कसे दाखल केले जातात याचे हे एक उत्तम उदाहरण आहे. आम्हाला अशा प्रकरणात गुंतवून आमचा वेळ वाया घालवणे हा सरकारचा एकमेव उद्देश असल्याचा आरोप आज प्रभुदेसाई यांनी केला.