मडगाव: काणकोण तालुक्यातील राजबाग तारीर येथील अपघाती मृत्यू प्रकरणात मृतांच्या कुटुंबीयांना इन्शुरन्स कंपनीने नुकसान भरपाई म्हणून ३७.४९ लाख रुपये देण्याचा आदेश न्यायालयाने दिला आहे.

दक्षिण गोवा जिल्हा व सत्र न्यायालयाच्या प्रधान न्यायाधीश शेरीन पॉल यांच्या न्यायालयात या खटल्याची सुनावणी झाली, नंतर न्यायाधीशांनी वरील निवाडा दिला. ७ सप्टेंबर २०२२ रोजी संध्याकाळी पावणेसहाच्या दरम्यान हा दोन कारमध्ये धडक बसून अपघात घडला होता. यात उल्हास राम नागेकर (६४ ), त्याची पत्नी वीणा (६०) व मुलगा हरीश (३५) हे ठार झाले होते. मयत उपासनगर वास्को येथे रहात होते. ते मूळ माजाळी - कारवारयेथील होते.

प्रतिवादी वाहनचालक प्रशांत तळेकर (४२, रा. कारवार), वाहनाच्या मालकीण स्नेहा कोठारकर (४५, रा. कारवार) व नॅशनल इन्शुरन्स कंपनी (कारवार शाखा) या तिघाही प्रतिवादींना दोषी ठरवून एकत्रितरित्या मृतांच्या कुटुंबीयांना नुकसान भरपाईची रक्कम द्यावी.

त्यात न्यायालयात खटला दाखल झाल्यापासून आजपर्यंत नुकसान भरपाईच्या रकमेवर ६ टक्के किमान व्याजही मृतांच्या कुटुंबीय हर्शिता नागेकर व तिची दोन वर्षांची मुलगी सैवी नागेकर यांना देण्यात यावी, असे न्यायाधीश पॉल यांनी आदेशात म्हटले आहे.