काणकोण: काणकोण आरोग्य केंद्रातील गलथान कारभारावर गोवा फॉरवर्डने तीव्र संताप व्यक्त केला असून केंद्रातील कारभार त्वरीत न सुधारल्यास आरोग्याधिकाऱ्यांना काणकोणकरांच्या रोषाचा सामना करावा लागेल, असा इशारा दिला आहे.

गुरूवारी (ता.९) सकाळी सहा वाजता गुरू बांदेकर व चंद्रकांत पागी हे दोन डायलेसीसचे रुग्ण अर्ध्या तासांहून जास्त वेळ लिफ्टमध्ये अडकले होते. बंद लिफ्टमधून त्यांनी जोरदार आवाज केला पण आवाज ऐकून तिथे आलेल्या देखरेख कर्मचाऱ्यांकडे लिफ्टची चावी नसल्याने ते काहीच मदत करू शकले नाहीत.

त्यामुळे दोन्ही रुग्णांचा रक्तदाब वाढून त्यांच्यावर बेशुद्ध होण्याची पाळी आली. सुदैवाने, ३५ मिनिटांनी मिनीटांनी दोन भिंतीच्या मध्ये अडकलेली लिफ्ट पहील्या माळ्यावर जावून उघडली व रुग्ण बाहेर आले. आरोग्य केंद्रातील लिफ्ट बंद पडण्याची ही पहीलीच घटना नसून यापूर्वीही चार पाच वेळा लिफ्ट बंद पडून रुग्ण आत अडकले.

संकटावेळी लिफ्टची चावी सुरक्षा कर्मचाऱ्यांकडे द्यावी व या कर्मचाऱ्यांना अशा घटना हाताळण्याचे प्रशिक्षण द्यावे, अशी मागणी प्रशांत नाईक यांनी केली आहे.