काणकोण: सुपारी वेचायला गेलेल्या लक्ष्मी शेट (वय ७४ वर्षे) या देळे- शेटकर वाड्यावरील ज्येष्ठ महिलेचा तळ्यात बुडून दुर्दैवी मृत्यू झाला. ही घटना आज सकाळी घडली.

त्यांची दोन मुले सकाळीच कामासाठी गेली होती. सध्या काणकोणात कच्च्या सुपारीची गळती सुरू झाली आहे. त्यामुळे लक्ष्मी या गळालेल्या सुपाऱ्या वेचायला बागायतीमध्ये गेल्या होत्या. येथील तळ्यात काही सुपाऱ्या पडल्या होत्या.

त्या काढण्यासाठी त्या तळ्यात उतरल्या असता त्यांचा पाय घसरला आणि त्या तळ्यात पडल्या. त्यांना पोहता येत नसल्यामुळे पाण्यात बुडून मृत्यू झाला, असे सूत्रांनी सांगितले.

शुक्रवारी स्थानिक स्मशानभूमीत शोकाकुल वातावरणात त्यांच्यावर अंत्यसंस्कार करण्यात आले. चारच वर्षांपूर्वी त्यांच्या पतीचा समुद्रात बुडून मृत्यू झाला होता, अशी माहिती मिळाली.