म्हापसा: डिसेंबर २०२३ मध्ये प्रसूतीदरम्यान ४१ वर्षीय महिलेचा मृत्यू झाला होता. तिचा मृत्यू संबंधित खासगी इस्पितळातील डॉक्टरांचा बेजबाबदारपणा व निष्काळजीपणामुळे झाल्याचा ठपका ‘गोमेकॉ’च्या रिड्रेसल कमिटीने अहवालात ठेवला आहे.
त्यानुसार पोलिसांनी नामांकित खासगी इस्पितळातील डॉक्टर दाम्पत्य अजित मोपकर आणि प्रीतम मोपकर यांच्यावर गुन्हा नोंदविला आहे. ही घटना २ डिसेंबर ते २७ डिसेंबर २०२३ या कालावधीत घडली. ४१ वर्षीय महिलेला प्रसूतीसाठी या खासगी इस्पितळात भरती केले होते.
ही महिला पाळी-कोठंबी येथील रहिवासी होती. या महिलेच्या मृत्यूनंतर म्हापसा पोलिसांनी या घटनेची नोंद अनैसर्गिक मृत्यू, अशी केली होती.
मात्र, गोमेकॉतील रिड्रेसल कमिटीने या प्रकरणाचा तपास करून अहवाल दिला की, या महिलेच्या प्रसूतीदरम्यान डॉक्टरांनी हलगर्जीपणा केल्याने महिलेचा मृत्यू झाला. या अहवालानुसार पोलिसांनी या डॉक्टर दाम्पत्यावर गुन्हा नोंद केला आहे. म्हापसा पोलिस याप्रकरणी अधिक तपास करत आहेत.
या महिलेला प्रसूतीसाठी या खासगी इस्पितळात भरती केले असता, तिने जुळ्या बाळांना जन्म दिला. मात्र, या प्रसूतीदरम्यान तिची व्यवस्थित काळजी घेण्यात आली नाही. परिणामी वैद्यकीय गुंतागुंत निर्माण झाल्याने महिलेला गोमेकॉत हलविले असता, तिचा उपचारावेळी निधन झाले. कालांतराने जुळ्या मुलांचाही मृत्यू झाला होता, असे सूत्रांकडून सांगण्यात आले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
