Calangute Murder Case

म्हापसा: कळंगुट समुद्रकिनाऱ्यावर मंगळवारी उत्तररात्री दोनच्या सुमारास आंध्र प्रदेशातील पर्यटकाचा खून झाल्याची घटना उघडकीस आली. याप्रकरणी शॅक मालक, त्याचा मुलगा आणि दोन कर्मचाऱ्यांना अटक केल्यानंतर, याप्रकरणात आता आणखी एका कर्मचाऱ्याला अटक करण्यात आली आहे. अटक चार संशयितांना नऊ दिवसांची पोलिस कोठडी सुनावण्यात आली आहे.

सुमन सोनार (२८, रा. मूळ नेपाळ) असे अटक करण्यात आलेल्या पाचव्या संशयिताचे नाव आहे. पोलिसांनी यापापूर्वी शॅक मालक आग्नेल सिल्वेरा (वय ६४) याच्यासह त्याचा मुलगा शुबर्ट सिल्वेरा (वय २३), अनिल बिस्ता (२४, मूळ नेपाळ) आणि कमल सुनार (२३, मूळ नेपाळ) यांना अटक केलीय. म्हापसा न्यायालयासमोर त्यांना हजर केले असता त्यांना नऊ दिवसांची पोलिस कोठडी सुनावण्यात आली आहे.

कळंगुट समुद्रकिनाऱ्यावर मरीना बीच शॅकवर बोल्लारवि तेजा (वय २८, रा. आंध्रप्रदेश) याचा खून झाला. किचन बंद झाल्यानंतर खाद्यपदार्थाची मागणी केल्याने शॅक कर्मचारी व बोल्लारवि यांच्यात वाद झाला. यातून झालेल्या हाणामारीत बोल्लारवि गंभीर जखमी झाला. त्याला कांदोळी येथील रुग्णालयात दाखल केले असता, त्याला मृत घोषित करण्यात आले.