पणजी, दोनापावल येथे चोऱ्यांचे प्रमाण वाढले आहे. यामुळे तेथील रहिवासी भयभीत झाल्याचे ताळगावच्या आमदार जेनिफर मोन्सेरात यांनी आज विधानसभेत शून्य तासाला नमूद केले. त्यावर मुख्यमंत्री डॉ. प्रमोद सावंत यांनी रात्रीच्या गस्तीत वाढ करू, असे नमूद केले.

सांतआंद्रेचे आमदार वीरेश बोरकर म्हणाले, सेंट ॲनाचे फेस्त हा राज्य महोत्सव म्हणून साजरा करण्याचे आश्वासन सरकारने दिले होते. तवशांचे फेस्त म्हणून प्रसिद्ध असलेल्‍या फेस्ताचा विसर पडला होता. २८ जुलै रोजी तळावली गावाने सेंट ॲनाचा उत्सव साजरा केला. स्व. मुख्यमंत्री मनोहर पर्रीकर म्हणाले होते की, सेंट ॲना फेस्त हे राज्य महोत्सव घोषित केले जाईल.

तथापि, आजपर्यंत अधिकृतपणे गोवा राजपत्रात याचा समावेश केलेला नाही. गेल्या वर्षी सेंट ॲना चर्चजवळ एक संरक्षक भिंत आणि उताराचा भाग कोसळला होता, त्यामुळे अनेक लोक प्रभावित झाले होते. एक वर्ष उलटून गेले आणि रस्ता अजूनही नादुरुस्त आहे. सरकारने दुरुस्ती केलेली नाही.

रहिवाशांमध्ये भीती

मोन्सेरात म्हणाल्या, वाढत्या चोरीच्या घटनांमुळे दोनापावल येथील रहिवाशांची घाबरगुंडी उडाली आहे. शेवटची चोरी ही २२ जुलै रोजी झाली होती, जिथे चोरट्यांनी मौल्यवान वस्तू चोरल्या होत्या.

४ महिन्यांतील ही तिसरी घटना असून त्यामुळे परिसरातील नागरिकांमध्ये भीतीचे वातावरण आहे. या समस्येचे निराकरण करण्यासाठी सरकारने तातडीने पावले उचलावीत.