Chicalim Theft: गोव्यातील चिखली येथे एक घरफोडी झाली आहे. एनआरआय व्यक्तीच्या घरात ही घरफोडी झाली आहे. यात 500 पाऊंड्ससह 25 हजार रूपयांची रोकड चोरांनी लंपास केली.

पोलिसांनी दिलेल्या माहितीनुसार, आशिष सिक्वेरा यांनी याबाबत पोलिसांत तक्रार दिली आहे.

ज्या बंगल्यात चोरी झाली आहे तो आशिष यांचा भाऊ जोसेफ सिक्वेरा यांचा आहे. आशिष हे नुवे येथे राहतात. तर जोसेफ यांचा बंगला चिखली येथे आहे.

जोसेफ एनआरआय आहे. तो एप्रिलमध्ये गोव्यात आला होता. 28 एप्रिलपासून जोसेफ सिक्वेरा परत गेला, त्यामुळे तेव्हापासून बंगला बंद होता. बंगल्याचे ग्रिल तोडून अज्ञातांनी बंगल्यात प्रवेश केला आणि येथील मौल्यवान वस्तू चोरून नेल्या.

आशिष यांना ही माहिती कळल्यावर त्यांनी जोसेफ यांना फोनवरून ही माहिती दिली. तसेच घरात जाऊन पाहणी केली. तेव्हा त्यांची 500 पाऊंड्सची ज्वेलरी आणि सुमारे 25 हजार रूपयांची रोकड चोरीस गेल्याचे निदर्शनास आले.

पोलिसांनी या घटनेचा पंचनामा केला आहे. दोन चोरट्यांनी ही चोरी केली असून ते दोघेही सीसीटीव्हीमध्ये कैद झाले आहेत. पोलिसांनी सीसीटीव्ही फुटेज पाहिले असून त्यानुसार तपास केला जात आहे. या चोरट्यांच्या शोधासाठी पथक नेमले आहे.

लवकरच या चोरट्यांना गजाआड करू, असा विश्वास पोलिसांनी व्यक्त केला आहे. पाळत ठेऊन ही चोरी केल्याचा अंदाज आहे.