पणजी: यंदाचा अर्थसंकल्प प्रामुख्याने गरीब, युवा, अन्नदाता शेतकरी आणि महिला सशक्तीकरणावर भर देणारा आहे. भारताला तिसरी जागतिक अर्थसत्ता बनविण्याच्या दृष्टिकोन असणारा, त्या अनुषंगाने महत्त्वाचे पाऊल टाकणारा हा अर्थसंकल्प असल्याचे मत आयसीआय गोवाचे अध्यक्ष मिलिंद शिरोडकर यांनी व्यक्त केले.

गोवा चेंबर ऑफ कॉमर्स येथे आयोजित व्हॉईस ऑफ इंडस्ट्रीज ॲण्ड ट्रेड बजेट २०२४-२५ कार्यक्रमात ते बोलत होते. यावेळी उद्योजक राल्फ डिसोझा, प्रतिमा धोंड, रोहन भंडारे, स्वप्निल दीक्षित आदी उपस्थित होते.

यंदाचा अर्थसंकल्प हा विकसित भारताची वाटचाल दाखविणारा अर्थसंकल्प असून युवा, उद्योग, सामान्य नागरिकांचा विचार करत मांडलेला अर्थसंकल्प असून उद्योग क्षेत्रासाठीही हा सकारात्मक अर्थसंकल्प असल्याचे टॅक्सेशन समितीचे रोहन भंडारे यांनी सांगितले.

केंद्र सरकारने कराच्या अनुषंगाने चांगले निर्णय घेतले आहेत. सर्वसामान्य नागरिकांच्या करामध्येही बदल करण्यात आल्याने हा अर्थसंकल्प एकाअर्थी सर्वसमावेशक असल्याचे त्यांनी सांगितले.

भारत हा सर्वात युवा देश आहे. त्यामुळे कौशल्यपूर्ण युवा आणि रोजगार निर्मितीचे सरकारसमोर आव्हान आहे त्या अनुषंगाने अनेक निर्णय घेण्यात आले असून अर्थसंकल्पाच्या अनुषंगाने अनेक नव्या गोष्टी घडतील अशी आशा व्यक्त करत असल्याचे राल्फ डिसोझा यांनी सांगितले.

सर्वांगीण विकासाला मदत

द इन्स्टिट्यूट ऑफ कंपनी सेक्रेटरीज ऑफ इंडियाच्या गोवा शाखेद्वारे अर्थसंकल्पाचे स्वागत करण्यात आले आहे. गेल्या दशकात सरकारने केलेल्या सुधारणांचे हे बजेट अत्यंत सकारात्मक सूचक आहे. इंडस्ट्रियल पार्क गोव्यात येत असेल तर ते स्वागतार्ह पाऊल ठरेल. कामगार आणि तांत्रिक सुधारणांद्वारे व्यवसायाच्या संधी वाढवून सर्वांगीण विकासाला अर्थसंकल्प मदत करेल, असे संघटनेचे अध्यक्ष स्वप्निल दीक्षित यांनी सांगितले.

महिला सशक्तीकरणाला वाव

केंद्र सरकारने सादर केलेल्या अर्थसंकल्पात महिला सशक्तीकरणाच्या अनुषंगाने अतिशय चांगला निर्णय घेतला आहे. येत्या काळात महिलांच्या नावावर मोठ्या प्रमाणात मालमत्ता खरेदी केली जाईल. उद्योग क्षेत्रात अनेक महिला आता पुढाकार घेत आहेत. त्यांच्यासाठी ही चांगली संधी आहे. सौर ऊर्जा, साधनसुविधा निर्मितीच्या अनुषंगाने देखील हा उत्तम अर्थसंकल्प आहे, परंतु यावर सविस्तर अभ्यास केल्यावरच योग्य त्या निर्णयापर्यंत पोहोचू शकू, असे उद्योजक प्रतिमा धोंड यांनी सांगितले.