Vasco Accidental Death: नवेवाडे - वास्को येथील शिवानी राजावत आणि तिची आई जयदेवी चौहान यांचा गॅस स्फोटात झालेला मृत्यू हा घातपात असल्याचा आरोप शिवानीच्या भावाने आणि वडिलांनी केला आहे.

त्यामुळे त्यांना पत्र पाठवून जबानी देण्यासाठी पोलिस स्थानकात उपस्थित राहण्यास सांगण्यात आले आहे.

शिवानीच्या मृत्यूप्रकरणी न्यायदंडाधिकाऱ्यांमार्फत चौकशी सुरू आहे. त्यांचा अहवाल आल्यानंतर पुढील कारवाई केली जाईल, अशी माहिती वास्कोचे पोलिस उपअधीक्षक सलीम शेख यांनी दिली.

या घटनेनंतर गोवा पोलिसांच्या फॉरेन्सिक विभागाने तेथे तपासणी केली आहे. त्यांचा अहवाल येणे बाकी आहे.

शिवानीच्या कुटुंबीयांनी या प्रकरणात घातपाताचा संशय व्यक्त केला आहे. त्यामुळे तिचा पती अनुराग राजावत याचीही चौकशी केली जात आहे.

फ्लॅटमध्ये गॅसगळती कशी झाली, याचाच तपास सुरू आहे. गॅस सिलिंडर जसेच्या तसे आहे.

त्यामुळे गॅस गळती मुद्दाम कोणी केली की, अनवधानाने गॅस सुरू राहिला आणि तो पेटवताना फ्लॅटमध्ये जमा झालेल्या गॅसचा भडका उडाला, याची माहिती गॅस कंपनीच्या तज्ज्ञांकडून मिळवली जात आहे.

सध्या याप्रकरणी अपघाताची नोंद करण्यात आली आहे. न्यायदंडाधिकाऱ्यांच्या अहवालातून जे समोर येईल, त्यानुसार तपासकामाची दिशा ठरणार आहे.