मुक्या प्राण्यांमध्ये देखील प्रेम, भावना आणि मदतीची वृत्ती असते याची प्रचिती देणारे अनेक प्रसंग वारंवार समोर आले आहेत. गोव्यातून देखील अशीच एक घटना उघडकीस आली आहे. रात्रीच्या सुमारास बिबट्याने घरातील एका पाळीव कुत्र्यावर हल्ला केला व फरफटत नेले याचवेळी घरातील दुसरा कुत्रा त्याच्या मदतीला धावला आणि त्याची सुटका केली. कुळे शिगाव पंचायत क्षेत्रातील कॅनलवाडा येथे रात्री ८-३० वाजता ही घटना उघडकीस आली.

मिळालेल्या माहितीनुसार, कुळे शिगाव पंचायत क्षेत्रातील कॅनलवाडा येथील नितेश नाईक यांच्या पाळीव कुत्रा अंगणात बसलेला असता त्याच्यावर रात्री ८-३० वाजता बिबट्याने झडप घालुन त्याला फरफटत नेले. यावेळी घरातील दुसऱ्या कुत्र्याने बिबट्यावर हल्ला केला. बिबट्याने पकडलेल्या कुत्र्याला सोडून जंगलात पळ काढला.

दरम्यान, पकडलेल्या कुत्रा जखमी झाला असुन त्याच्या गळ्याला दात व अंगाला नखे ओरबडली आहेत. घडलेला सर्व प्रकार वन खात्याला कळविले असता त्यांनी या ठिकाणी येऊन पहाणी करुन सिसिटिव्ही कॅमेरा कार्यान्वित केला आहे.

जखमी कुत्र्यावर घरगुती उपचार घर मालकाने केला आहे. दरम्यान, यापूर्वी येथे बिबट्याने हल्ला केल्याच्या अनेक घटना समोर आल्या आहेत. बिबट्याने पाळीव कुत्र्यांवर हल्ला करुन त्यांना ठार केल्याच्या घटनांमुळे त्रस्त झालेल्या स्थानिकांनी बिबट्याचा बंदोबस्त वन खात्याने करावा अशी मागणी केली जात आहे.