पणजी: भारतीय संविधान आणि बायबल दोन्ही भारतीय ख्रिस्ती लोकांसाठी जीवनाचा आधार आहेत, असे मत गोवा आणि दमण येथून प्रसिद्ध होणाऱ्या चर्च बुलेटीनमध्ये मांडण्यात आले आहे. रेनोवाकाव या बुलेटीनमध्ये 'बिईंग अ‍ॅन इंडियन ख्रिश्चन' या लेखातून विचार मांडण्यात आले आहेत.

भारतीय संविधानाकडे दुर्लक्ष केल्याने दुरगामी परिणाम निर्माण होऊ शकतात, असे या चर्च बुलेटीनमध्ये म्हटले आहे. प्रजासत्ताक दिनानिमित्त प्रसिद्ध झालेल्या या लेखात भारतीय संविधान आणि बायबलचा फोटो देण्यात आला आहे. प्रत्येक नागरिकाला संविधानाची माहिती असणे आवश्यक असल्याचे या लेखात म्हटले आहे. किमान संविधानाची प्रस्तावना तरी माहिती आसावी असे लेखात नमूद करण्यात आले आहे.

संविधानाची किमान माहिती आणि ज्ञान तरी असावे. यातील अधिकारांकडे दुर्लक्ष केल्यास आपण राजकीय नेते, वकीलांचे गुलाम होऊ, असे या लेखात म्हटले आहे. भारतीय संविधान आणि बायबल दोन्ही वेगवेगळे असले तरी भारतीय ख्रिस्ती नागरिकांसाठी हे दोन्ही ग्रंथ महत्वाचे आहेत, असे या लेखात लिहले आहे.

कोणाचाही जन्म पहिल्यांदा एक मानवी देह म्हणून होतो. त्यानंतर त्याची नोंद पंचायत किंवा पालिकेत केली जाते. भारतीय म्हणून नोंद झाल्यानंतरच त्याचा कोणत्याही धर्मात प्रवेश होत असतो, असे या लेखात म्हटले आहे.