Sattari Drowning Case: पोहण्यासाठी गेलेल्या राजस्थानच्या पर्यटकाचा सत्तरी येथे नदीत बुडून मृत्यू

सत्तरी: काजरेघाट, कुमठल येथे नदीत पर्यटक बुडाल्याची घटना रविवारी (२६ जानेवारी) सायंकाळी उघडकीस आली. सायंकाळी घडलेल्या घटनेनंतर सुरु केलेले शोधकार्य रात्री अंधार पडल्यामुळे बंद करण्यात आले व सकाळी पुन्हा सुरु करण्यात आले असता तरुणाचा मृतदेह आढळून आला आहे.

प्रदीप कुमार (२३, रा. राजस्थान) असे या पर्यटकाचे नाव आहे. प्रदीप काही मित्रांसोबत पर्यटनासाठी येथे आला असता ही घटना घडली. त्याच्यासाठी वाळपई अग्निशमन दलाने तात्काळ शोधकार्य सुरु केले.

पण, वन्य परिसर आणि अंधार पडल्यामुळे शोधकार्य थांबविण्यात आले. दरम्यान, सोमवारी (२७ जानेवारी) शोधकार्य पुन्हा सुरु करण्यात आले. दरम्यान, तरुणाचा मृतदेह आढळून आला आहे.