Goa Crime: ऑनलाइन जुगारात झाला कंगाल; ओडिशाच्या तरुणाने गोव्यात संपवले जीवन

फोंडा: ऑनलाइन जुगारात कंगाल झालेल्या तरुणाने गोव्यात आत्महत्या केल्याची घटना उघडकीस आली आहे. मूळ ओ़डिशाचा असणारा तरुण गोव्यातील वेलिंग, फोंडा येथे वास्तव्यास होता. मृत व्यक्ती कुंडई येथील एका खासगी कंपनीत काम करत होता.

जगबंधू धनेश्वर नायक (28, मूळ ओडिशा) असे आत्महत्या केलेल्या तरुणाचे नाव आहे. म्हार्दोळ पोलिसांनी दिलेल्या माहितीनुसार, पंच रुपेश नाईक यांना वन परिसरातून दुर्गंध येऊ लागला. यामुळे त्यांनी परिसराची पाहणी केली असता, जंगबंधू याचा कुजलेल्या अवस्थेतील मृतदेह आढळून आला.

दरम्यान, म्हार्दोळ पोलिस स्थानकात १६ जानेवारी रोजी दाखल झालेल्या बेपत्ता व्यक्तीची तक्रार आणि सापडलेला मृतदेह याची तपासणी केली असता ती जुळल्याची माहिती पोलिसांनी दिली.

नायकने गेल्या काही दिवसांपूर्वी घरी फोन करुन तो ऑनलाइन जुगारात कंगाल झाल्याची माहिती दिली होती. तसेच, घरच्यांनी त्याचा आता शोध घेऊ नये, असे देखील त्याने फोनवरुन सांगतिले होते, अशी माहिती पोलिसांनी दिली आहे. दक्षिण गोवा जिल्हा रुग्णालयात शवविच्छेदन केल्यानंतर जगबंधू धनेश्वर नायक याचा मृतदेह त्याच्या कुटुंबियांच्या स्वाधीन करण्यात आला.