पणजी: गोव्यातील एकमेव प्राणी संग्रहालय असलेल्या बोंडला वन्यजीव अभयारण्यमधील प्राणी संग्रहालय ३० एप्रिलपासून पुन्हा सर्वसामान्यांसाठी खुले होण्याची शक्यता असल्याची माहिती सूत्रांकडून मिळाली आहे.

बोंडला प्राणी संग्रहालय १ एप्रिल रोजी तात्पुरते बंद करण्यात आले होते. मार्च ६ ते ९ दरम्यान तीन सिव्हेट मांजरी आणि दोन जंगल मांजरींचा संशयास्पद मृत्यू झाल्याने संग्रहालय बंद करण्याचा निर्णय विभागाने घेतला होता.

यानंतर त्वरीत उपाययोजना केल्या गेल्या. मृत जंगल मांजरापैकी दोन प्राण्यांमध्ये एच५एन१ या एव्हियन इन्फ्लूएंझा विषाणूचा संसर्ग आढळून आला होता, तर सिव्हेट मांजरींच्या मृत्यूचे कारण अद्यापही स्पष्ट झालेले नाही.

मिळालेल्या माहितीनुसार या मृत्यूंनंतर ३० मार्चला अधिकाऱ्यांनी तातडीने बोडला बंदी आदेश जारी करत प्राणी संग्रहालयात १५ दिवसांचा क्वारंटाईन कालावधी लागू केला होता, जो १५ एप्रिल रोजी संपला. तरीही, पूर्ण खात्री होईपर्यंत प्राणी संग्रहालय पुन्हा खुले करण्यात आले नव्हते.

अधिकृत घोषणा लवकरच

सध्या भोपाळ येथील राष्ट्रीय उच्च सुरक्षा प्राणी रोग संस्था या संस्थेमार्फत बोंडला येथील नमुन्यांची ‘डबल कन्फर्मेशन’ तपासणी सुरू आहे. पहिल्या फेरीतील तपासणीचा निकाल नकारात्मक (नेगेटिव्ह) आला आहे. दुसऱ्या फेरीतील तपासणीचे नमुने नुकतेच भोपाळला पाठविण्यात आले असून, त्याचा निकाल काही दिवसांत अपेक्षित आहे. दुसरी चाचणीही नकारात्मक आल्यास बोंडला प्राणी संग्रहालय ३० एप्रिल रोजी सर्वसामान्यांसाठी उघडले जाईल. याबाबत अधिकृत घोषणाही लवकरच अपेक्षित आहे.