म्हापसा: खोर्ली-म्हापसा येथील रहिवासी तथा भारतीय दूरसंचार निगमचे लिमिटेडचे (BSNL) कर्मचारी देवदत्त दामोदर गावस (43) यांचा मृतदेह गुरुवारी सकाळी तार नदीच्या पात्रात तरंगताना म्हापसा पोलिसांना सापडला. त्‍यांनी मानसिक तणावातून तार नदीत उडी टाकून आत्महत्या केली असावी, असा संशय पोलिसांनी व्यक्त केला आहे. (Body of a BSNL employee in Goa was found floating in river)

बुधवारी सकाळी तार पुलावरून एका अज्ञात तरुणाने नदीत उडी घेतल्याचे तेथील रहिवाशांनी पोलिसांना कळवले होते. त्यानंतर काल दिवसभर म्हापसा पोलिसांनी अग्निशमन दल व जीवरक्षकांच्या साहाय्याने नदीमध्ये मृतदेहाचा शोध घेण्याचा प्रयत्‍न केला होता. अखेरीस आज सकाळी साडेदहाच्या सुमारास नदीच्या पात्रात त्यांचा मृतदेह तरंगताना आढळला.

मृतदेह पाण्यातून बाहेर काढल्यानंतर तो देवदत्त गावस याचा असल्याची ओळख पटली. देवदत्त बेपत्ता असल्याने त्यांच्या पत्नीने बुधवारी रात्री पोलिसांत तक्रार दाखल केली होती. देवदत्त यांच्‍या पश्चात पत्नी, दोन लहान मुले व आई असा परिवार आहे.