दाबोळी - प्रधानमंत्री नरेंद्र मोदी (Narendra Modi) यांच्या 71व्या वाढदिवसाप्रित्यर्थ मुरगाव भारतीय जनता पार्टी मंडळातर्फे एमपीटी रुग्णालयात रुग्णांना फळांचे वाटप करण्यात आले. शुक्रवारी भारताचे प्रधानमंत्री श्री नरेंद्र मोदीजींच्या 71व्या वाढदिवसानिमित्त देशभरात विविध ठिकाणी विविध कार्यक्रमांचे आयोजन करण्यात आले होते. यात मोदींच्या वाढदिवसाचे औचित्य साधून लसीकरणामध्ये भारताने नवा विक्रम प्रस्थापित केला.

भारतात नऊ तासात दोन कोटी जणांचे लसीकरण करण्यात आले. सदर लसीकरण अभियान उशिरा रात्री पर्यंत चालले होते.दरम्यान मुरगाव भाजपा मंडळातर्फे एमपीटी रुग्णालयात आजारी रुग्णांना फळांचे वाटप केले आणि आजारातून लवकर बरे होण्यासाठी प्रार्थना केली.

याप्रसंगी मुरगावचे आमदार तथा नगरविकास मंत्री श्री मिलिंद नाईक, भाजप मंडळाचे अध्यक्ष संजय सातार्डेकर, नगरसेविका मंजूषा पिळणकर, दयानंद नाईक, कुणाली पार्सेकर, दामोदर नाईक, शशिकांत परब, महिला मोर्चा अध्यक्षा छाया होनावरकर, युवा मोर्चा अध्यक्ष योगेश बांदेकर उपस्थित होते.

यावेळी बोलताना मंत्री मिलिंद नाईक यांनी,भारताचे प्रधानमंत्री नरेंद्र मोदी यांनी देशातील सर्वांना सुख समृद्धीसाठी विविध योजनांची अंमलबजावणी सुरू केली.याचा फायदा सर्व देशवासीय घेत आहे.त्यांच्या पुढील वाटचालीस शुभेच्छा देण्यासाठी रुग्णालयात रुग्णांना फळांचे वाटप करण्यात आले असल्याचे ते म्हणाले.