मडगाव: सांखवाळ येथील बिट्स पिलानी कॅम्पसमध्ये १५ दिवसांपूर्वी कुशाग्र जैन या २१ वर्षीय विद्यार्थ्याचा झालेला मृत्यू हा अमली पदार्थांच्या सेवनामुळे नव्हे, तर उच्च रक्तदाबाच्या विकारावर नियंत्रण आणण्यासाठी ज्या गोळ्यांचा वापर केला जातो त्या गोळ्यांचे सेवन केल्यामुळे झाल्याचे फॉरेन्सिक अहवालात स्पष्ट झाले आहे.

१७ ऑगस्ट रोजी बिट्स पिलानी कॅम्पसच्या हॉस्टेलमध्ये झोपलेल्या अवस्थेत कुशाग्रचा मृत्यू झाला होता. मात्र, हा प्रकार आत्महत्येचा नसल्याचे त्यावेळी दिसून आले होते.

कुशाग्रचा मृत्यू झाला, त्यादिवशी तो दुपारी २.१२ पर्यंत व्हॉट्स ॲपवर ऍक्टिव्ह होता. नंतर त्याने टेबल टेनिस खेळले आणि नंतर तो हॉस्टेलवरील रूमवर गेला होता.

हा मृत्यू अमली पदार्थांच्या सेवनामुळे झाला नसल्याचे जरी स्पष्ट झाले असले तरी २१ वर्षांचा हा युवक उच्च रक्तदाबाच्या गोळ्यांचे सेवन का करत होता, हा नवा गूढ प्रश्न या अहवालामुळे निर्माण झाला आहे.