BITS पिलानी के के बिर्ला गोवा कॅम्पसची 20 वर्ष पूर्ण होत आहेत. यानिमित्ताने गोव्यातील शाळा आणि महाविद्यालयाच्या विद्यार्थ्यांना BITS पिलानी कॅम्पस खुला केला जाणार आहे. विद्यार्थ्यांना येथील सुविधांचा अनुभव घेण्यासह आणि संशोधन प्रकल्प पाहता येणार आहेत.

20 वर्ष पूर्ण होण्याच्या पार्श्वभूमीवर संस्था वर्षभरात विविध कार्यक्रम आयोजित करणार आहे. 1 नोव्हेंबर ते 31 ऑक्टोबर 2024 या काळात यात सहभागी होता येईल.

6 नोव्हेंबर, सकाळी 9 ते संध्याकाळी 6 पर्यंत, BITS कॅम्पस राज्यातील विद्यार्थ्यांसाठी खुले ठेवले जाणार आहे. तर, संस्थेच्या वतीने जानेवारी 2024 मध्ये इंडियन स्पेस रिसर्च ऑर्गनायझेशन (इस्रो) चे अध्यक्ष एस सोमनाथ यांचे जाहीर व्याख्यान सर्वांना ऐकता येणार आहे.

सर्व प्रयोगशाळा आणि उच्चस्तरीय संशोधन केंद्रे विद्यार्थी आणि सर्वसामान्य नागरिकांसाठी खुली असतील. आमचे प्रोटोटाइप आणि इतर विज्ञान, अर्थशास्त्र आणि साहित्य प्रकल्प पाहण्यासाठी प्रदर्शित केले जातील.

या काळात दोन सार्वजनिक व्याख्याने देखील आयोजित केली जातील, ज्यात गोवाचे आर्किटेक्ट डीन डिक्रूझ आणि BITS पिलानी के के बिर्ला गोवा कॅम्पस संचालक, प्राध्यापक सुमन कुंडू यांची व्याख्याने असतील.

कॅम्पसमधील 2,200 प्रेक्षक क्षमता असलेल्या सभागृहात सार्वजनिक व्याख्याने होणार आहेत. यापैकी पहिले व्याख्यान 1 नोव्हेंबर रोजी देशातील सर्वात प्रसिद्ध खगोलभौतिकशास्त्रज्ञ जयंत मूर्ती यांचे होईल.

यानंतर, 2 नोव्हेंबर ते 5 नोव्हेंबर दरम्यान, नॅशनल सेंटर फॉर पोलर आणि ओशन रिसर्च (NCPOR) आणि इंडियन अॅकॅडमी ऑफ सायन्सेस, बेंगळुरू सोबत बैठक आयोजित करणार आहोत, अशी माहिती BITS पिलानी के के बिर्ला गोवा कॅम्पस डायरेक्टर, प्रोफेसर सुमन कुंडू यांनी एका इंग्रजी वृत्तपत्राला दिली आहे.

इंडियन अॅकॅडमी ऑफ सायन्सेसच्या बैठकीत गोवा विद्यापीठ आणि राज्यभरातील महाविद्यालयांच्या शिक्षकांसाठी विज्ञान कार्यशाळा घेण्यात येणार आहे.