पणजी: बिट्स पिलानी गोवा कॅम्पसवर घडलेल्या विद्यार्थ्यांच्या सलग मृत्यूंची राज्य सरकारकडून सखोल चौकशी करावी, त्याचबरोबर उच्च न्यायालयाच्या खंडपीठाने या प्रकरणाची स्वेच्छा दखल घेऊन मृत्यूंच्या चौकशीसाठी न्यायालयीन आयोग नेमावा, अशी मागणी महिला प्रदेश काँग्रेसच्या अध्यक्ष डॉ. प्रतीक्षा खलप यांनी केली.

काँग्रेस भवनात शुक्रवारी दुपारी झालेल्या पत्रकार परिषदेत त्या बोलत होत्या. याप्रसंगी उपाध्यक्षा सई वळवईकर, दक्षिण गोवा जिल्हा अध्यक्षा ममता माबेन व कुठ्ठाळी ब्लॉक अध्यक्ष लता नाईक उपस्थित होत्या.

खलप म्हणाल्या, बिट्स पिलानी या प्रख्यात संस्थेत विद्यार्थ्यांच्या मृत्यूची नऊ महिन्यांत पाचव्या घडलेल्या घटनेने अनेक गंभीर प्रश्न निर्माण केले आहेत. या संस्थेतच का घडत आहे? अजूनही चौकशी सुरू आहे, असे सरकार सांगते, सरकार नेमके काय करतेय?

चौकशी आयोग नेमा

गोवा खंडपीठाने न्यायालयीन आयोग नेमून चौकशीचे आदेश द्यावेत, असे खलप म्हणाल्या. याशिवाय राज्यात घडलेल्या आत्महत्यांच्या घटनांची आकडेवारीही त्यांनी सांगितली.

त्या म्हणाल्या, २०२१ मध्ये २१२, २०२२ मध्ये ३०४ आणि २०२३ मध्ये ३२९ आत्महत्या झाल्या आहेत. यावरून दरवर्षी हा आकडा वाढतो आहे. ही अत्यंत गंभीर व चिंताजनक असल्याचेही त्यांनी सांगितले.