कुचेली येथे एका भरधाव दुचाकीस्वाराने तीन वर्षीय चिमुकल्याला जोरात धडक देऊन घटनास्थळावरून पळ काढला होता. सुदैवाने हा मुलगा किरकोळ जखमी होऊन बचावला. हा प्रसंग सीसीटीव्ही कॅमेऱ्यात कैद झाल्यामुळे पोलिसांनी संशयिताला अटक केली.

ही घटना मंगळवारी (ता.१३) दुपारी १.३० च्या सुमारास घडली. रस्ता ओलांडताना अंशकुमार बेन (वय ३ वर्षे) याला दुचाकीस्वाराने जोरात धडक दिली. संशयित राकेश पाटील (वय २१ वर्षे, रा. गणेशनगर-कोलवाळ) हा जीए-०३-एएल-८२६४ या दुचाकीवरून घोटणीचो व्हाळकडून कुचेली साईबाबा मंदिराच्या दिशेने जात होता.

कुचेलीत थरार

अपघाताचा व्हिडिओ सोशल मीडियावर व्हायरल झाला. या चालकाने हेल्मेट परिधान केले नव्हते. रस्ता ओलांडणाऱ्या चिमुकल्याला त्याच्या गाडीची जोरदार धडक बसते. त्यानंतर मुलगा रस्त्यावर पडतो.

अपघातानंतर दुचाकीस्वार पुढे काही अंतरावर जाऊन थांबतो आणि मागे वळून पाहतो. घरातील महिला धावत मुलाला उचलण्यासाठी येतात. मात्र, त्यांना पाहून दुचाकीस्वार घाबरून घटनास्थळावरून पोबारा करतानाचा प्रसंग कॅमेऱ्यात कैद झाला आहे.

दुचाकी अपघातात एक ठार, एक जखमी

हरमल : भोम-हरमल येथे एका वळणावर मोटारसायकल व स्कूटर यांच्यात झालेल्या अपघातात एक जागीच ठार झाला, तर एक जखमी झाला. १३ रोजी रात्री ११ च्या सुमारास स्कूटरवरून दोघेजण हरमलला येत होते.

त्यापैकी नेपाळी अनिल (वय २२ वर्षे) हा जबर जखमी झाला, तर अन्य एक बचावला. दुचाकीस्वार पिंगेश शहा (वय ३५ वर्षे, रा. मुंबई) हा पालयेकडे जाताना दोन्ही वाहनांची धडक होऊन तो जागीच ठार झाला.