डिचोली: शहराच्या वैभवात भर घालणारा ‘वॉकिंग ट्रॅक’ पुन्हा एकदा अंधारमय बनला आहे. गेल्या दोन दिवसांपासून पथदीप पेटत नसल्याने रात्रीच्यावेळी या ‘वॉकिंग ट्रॅक’वर अंधाराचे साम्राज्य पसरत आहे. महिन्यापूर्वी ही समस्या निर्माण झाली होती. मात्र, काही दिवसांपूर्वी तांत्रिक बिघाड दूर केल्यानंतर ही समस्या दूर झाली होती. पण आता पुन्हा पथदीप बंद झाले आहेत.

पूल ते गावकरवाडापर्यंतच्या वॉकिंग ट्रॅकवर जवळपास ३१ पथदीपांची व्यवस्था करण्यात आली आहे. सध्या एकही पथदीप पेटत नाही, अशी माहिती या ‘वॉकिंग ट्रॅक’वर फेरफटका मारणाऱ्या नागरिकांकडून देण्यात आली आहे. नादुरुस्त पथदीप एकतर दुरुस्त करावेत. नपेक्षा नवीन पथदीप बसवावेत, अशी नागरिकांकडून मागणी होत आहे.

शहरातील जुना पूल ते गावकरवाड्यापर्यंत नदीकाठी बांधण्यात आलेला हा बांध वजा ‘वॉकिंग ट्रॅक’ म्हणजे अनेकांचे विरंगुळ्याचे ठिकाण बनले आहे. मात्र, ‘ट्रॅक’वरील पथदीप पेटत नसल्याने मोठी समस्या निर्माण होत आहे. अंधारामुळे महिलांत भीती पसरली आहे.

सुरक्षिततेकडे लक्ष द्या!

‘वॉकिंग ट्रॅक’ म्हणजे शहरवासीयांसाठी वरदान ठरलेला आहे. महिला, वृद्ध मिळून शेकडो नागरिक नियमितपणे वॉकिंग ट्रॅकवर शतपावलीसाठी येतात. वॉकिंग ट्रॅकवर मनमोकळे फिरण्यासाठी येणाऱ्या नागरिकांच्या सुरक्षितेकडे लक्ष देणे आवश्यक आहे. या ट्रॅकवरील पथदीप आदी गैरसोयीकडे सरकारने लक्ष घालून, महिलांमधील भीती दूर करावी, अशी मागणी वॉकिंग ट्रॅकवर नियमित येणाऱ्या शिवकुमार, सुभाष धारगळकर आणि संजू वेर्णेकर यांनी केली आहे.