डिचोली: गावकरवाडा - डिचोली येथील श्री शांतादुर्गा मंदिर परिसरात आंब्याची भली मोठी फांदी कोसळण्याची घटना घडली. ही फांदी वीजवाहिन्यांवर कोसळल्याने विजेचा एक खांबही मोडला. झाड कोसळण्याची ही घटना आज सायंकाळी पाच वाजण्याच्या सुमारास घडली.

वीजवाहिन्या तुटून खांब मोडल्याने जवळपास अडीच तास गावकरवाडा परिसरात वीजपुरवठा खंडित झाला. वीज खात्याच्या कर्मचाऱ्यांनी दुरुस्ती काम केल्यानंतर सायंकाळी साडेसात वाजण्याच्या सुमारास वीजपुरवठा सुरळीत झाला. या घटनेत मात्र कोणताही अनर्थ घडला नाही.

डिचोली अग्निशमन दलाचे लिडींग फायर फायटर अर्जुन धावस्कर यांच्या नेतृत्वाखालील दलाच्या जवानांनी मदतकार्य करून फांदी हटवली. फांदी कोसळल्यामुळे बसस्थानकाच्या दिशेने जाणाऱ्या रस्त्यावरील वाहतूकही अडकून पडली.