डिचोली: डिचोलीची नदी प्रदूषणाच्या विळख्यात अडकली असून, दिवसेंदिवस या नदीत मानवनिर्मित प्रदूषणाचे आक्रमण वाढत आहे. त्यातच केंद्रीय आणि राज्य प्रदूषण मंडळानेदेखील आपल्या अहवालात डिचोलीची नदी सर्वात जास्त प्रदूषित असल्याचे नमूद केले आहे.

सध्या तर या नदीचे पाणी आटले असून, नदी अक्षरशः काळपट बनली आहे. या नदीच्या सद्यस्थितीबाबत पर्यावरणप्रेमींनीदेखील चिंता व्यक्त केली आहे. राज्य सरकार तसेच नगरपालिकेसह पंचायतींनी वेळीच उपाययोजना केली नाही, तर या नदीचे अस्तित्व संकटात येण्याचा धोका आहे, अशी भीती पर्यावरण अभ्यासक प्रा. राजेंद्र केरकर यांनी व्यक्त केली आहे.

महाराष्ट्रातील तळेखोल येथून उगम झालेली डिचोलीची नदी ही मांडवीची उपनदी आहे. डिचोलीहून पुढे सारमानस येथे ही नदी मांडवी नदीला जाऊन मिळते. या नदीवर कुडचिरे ते डिचोलीपर्यंत आठ ते नऊ बंधारे आहेत.

या नदीत काहीजण घरातील किंवा हॉटेलमधील सुका आणि ओला कचरा तसेच टाकाऊ पदार्थ टाकत असल्याची माहिती मिळाली आहे. विविध ठिकाणी या नदीत आजही नियमित कपडे धुण्याचे प्रकार घडत आहेत. राज्याबाहेरील लोक सर्रासपणे नदीच्या पाण्यात कपडे धुताना दिसून येतात.

नदीत सोडले जाते सांडपाणी!

डिचोली शहरात मलनिस्सारण प्रकल्प नसल्याने सांडपाण्याची मोठी समस्या आहे. पावसाळ्यात तर नदीजवळील भागातील सांडपाणी पावसाच्या पाण्याबरोबर नदीत मिसळते. काही ठिकाणी पाईपद्वारे बाहेरील पाणी या नदीत सोडण्यात येत आहे. नदीला जोडलेल्या फाट्यातून नदीत अस्वच्छता पसरते. डिचोली हा भाग खाणपट्ट्यात येत असल्यामुळे पावसाळ्यात खनिजमिश्रित पाणी नदीत मिसळते. त्यामुळे नदीच्या प्रदूषणात भर पडत आहे.