Shel Melavli Illegal Slaughterhouse Mine Busted in Bicholim Police Raid

वाळपई: पोलिसांनी केलेल्या एका धडक कारवाईत शेळ-मेळावली येथे एका बेकायदा चिरेखाणीवर छापा टाकून चिरे काढण्याखाणी वापरण्यात येणारी मोठ्या प्रमाणात यंत्रसामग्री जप्त केली. जप्त केलेल्या यंत्रसामग्रीची किमत अंदाजे २० लाख रुपये असल्याची माहिती मिळाली. आज (रविवारी) ही कारवाई केली. डिचोलीचे पोलिस अधीक्षक जिवबा दळवी ही माहिती दिली.

शेळ-मेळावली येथील डोंगराळ भागात मोठ्या प्रमाणात बेकायदेशीरपणे चिरे काढण्याचा व्यवसाय चालत असल्याची माहिती मिळताच, वाळपई पोलिस स्थानकाच्या महिला पोलिस उपनिरीक्षक सानिषा नाईक आणि पोलिस उपनिरीक्षक अल्लाउद्दीन खान यांच्या नेतृत्वाखाली पोलिस पथकाने संबंधीत खाणीवर धाड मारली. चिरेखाणीवर धाड घातलेल्या पथकात पोलिस कॉन्स्टेबल सिद्धेश गावस, उल्हास गावस यांचा समावेश होता.

पोलिसांनी कारवाई करुन ५ पॉवर टिलर, चिरे कापण्याची ४ यंत्रे आणि २ जनरेटर जप्त केले. पोलिसांनी पंचनामा करून अज्ञातांविरोधात भारतीय न्याय संहिता आणि खाण कायद्यांतर्गत गुन्हा नोंद केला आहे. उत्तर गोव्याचे पोलिस अधीक्षक अक्षत कौशल, डिचोलीचे पोलिस उपअधीक्षक जिवबा दळवी आणि पोलिस निरीक्षक दिनेश गडेकर यांच्या मार्गदर्शनाखाली पोलिस पुढील तपास करीत आहेत.